Cerezal va presentar el so segundu trabayu, ‘Camín’, el 23 de payares en Mieres

La formación folk Cerezal va asoleyar esti mes el so segundu trabayu d’estudiu, ‘Camín’. Tres l’EP espublizáu l’añu pasáu, los mierenses dan un pasu más na so trayeutoria con esti llarga duración que van presentar el domingu 23 de payares con un conciertu en Mieres.

‘Camín’ (Algamar Producciones) grabóse y mezclóse en TUTU Studios de la mano de Sergio Rodríguez y Ruboh, y contó cola producción del propiu grupu. Con él, Cerezal continúa cola so apuesta de folk acústicu y estilu frescu averáu al pop –siendo la mayoría de los temes cantaos– que yá amosaron nel EP autoproducíu ‘Cerezal’. En total son 12 cortes, más un ‘bonus track’, a lo qu’hai que sumar una montonera de material audiovisual a la que namái van tener accesu aquelles persones que merquen dalguna de les primeres 500 copies: fotos, lletres y vídeos, ente los que ta el videuclip del tema ‘Nueche’, grabáu en direuto y nel que la banda ta acompañada de los hermanos Tejedor, Marco Antonio Guardado, Ruboh UnoMasUno, Vrienden, Rubén Alba o Fernando Oyagüez. Los cantares son principalmente composiciones propies, anque tamién hai revisiones de temes tradicionales.

La formación de Cerezal, compuesta por Juanjo Díaz (percusiones y batería), David Mori (flauta, whistle y gaita asturiana), Andrea Álvarez (voz), Juan Yagüe (guitarra, bouzuki y mandolina) y Gonzalo Pumares (vigulín y voz), cuenta nesti trabayu discográficu con dos collaboraciones de sonadía, como la de Juan Carlos Vega Cabín (baxu) y Victor Manuel (voz). Los mierensen van presentar ‘Camín’ en casa con un conciertu previstu pal domingu 23 de payares, a les 20 hores, nel Auditoriu Teodoro Cuesta.