Yá ta a la venta l’Anuariu de la Música Asturiana del 2014. Skanda, que distribúi esta selmana’l llibru-CD-DVD ’18’ cola grabación d’un conciertu especial de la banda en Mieres, protagoniza la portada de la espublización de Goxe Producciones.

Emilia Vázquez, diputada d’Izquierda Xunida (IX) na Xunta Xeneral, declaró que’l refugu del Ministeriu d’Educación, Cultura y Deporte a la especialidá ye un “despreciu a los asturianos”. Solicitó implicación al Gobiernu y apuntó necesaria la oficialidá del idioma pa solucionar el problema.

El refugu del Ministeriu d’Educación, Cultura y Deporte a la especialidá d’asturianu obliga a mover ficha con urxencia. El día 3 ye’l Conseyu Escolar Estatal, cita que SUATEA considera como la posibilidá última d’adaptar el Decretu de les Especialidaes Docentes d’Educación Secundaria a la demanda d’Asturies, pa lo que ve necesaria la implicación de tola comunidá educativa.

Victorina Fernández, direutora xeneral de Formación Profesional, Desarrollu Curricular y Planificación Educativa, anunció esti miércoles que’l ministru José Ignacio Wert nun reconociera la especialidá docente d’asturianu que demandara’l Gobiernu del país. L’ALLA reclama a la conseyera Ana González qu’acuda “espresamente a Madrid a negociar esta cuestión”.

El sábadu finó’l plazu pa la presentación de candidatures a los diferentes Premios Timón qu’entrega l’Asociación Cultural L’Arribada mientres la Vagamar. No que correspuende a los gallardones lliterarios, nesta edición aspiren los escritores nacíos nel añu 1965 o enantes.

Somos Asturies, nuna asamblea celebrada'l sábadu na Biblioteca d’Asturies ‘Ramón Pérez de Ayala’, decidió nomar a Daniel Ripa como candidatu a la secretaría xeneral de Podemos nel país. Esta corriente, que tien el sofitu de Compromisu por Asturies, algamó la victoria nes primaries municipales en 24 de los 32 conceyos nos que se presentó.

L’Asociación de Trabayadores de la Normalización Llingüística condenó recién “la situación d’inestabilidá y precariedá llaboral llaceriosa” d’esti coleutivu por mor de la “xestión pública pésima de conceyos y Principáu”, ente otres coses. Iniciativa pol Asturianu sofita les sos reclamaciones y demanda a Cultura convenios pa caltener estos servicios y a los ayuntamientos, responsabilidá.

Estes selmanes últimes, coincidiendo col regresu de miles d’asturianos a los sos llugares d’orixe poles fiestes navidiegues, aprovechóles Darréu pa intensificar la campaña de denuncia de la emigración forciada que vive la mocedá asturiano. La organización ta acabante de celebrar el so V Conceyu Nacional, nel que decidió desvenceyase dafechu d’Andecha Astur.

“Harry El Suciu”, el tercer llargometraxe dobláu al asturianu pa TPA, tuvo esti vienres 2 de xineru una audiencia del 3,7% y 13.000 espectadores lo que, anque con datos más discretos, vien sumase a los bonos resultaos algamaos poles dos pelicules anteriores n’asturianu. Esta película norteamericana, dirixida en 1971 por Don Siegel y protagonizada por Clint Eastwood, llegó a triplicar los datos del cine en castellanu emitíu nel mesmu horariu nestes feches navidiegues.

El Comité d’Espertos de la Carta Europea de les Llingües Minoritaries o Rexonales nun aconceyó pal informe del 2014 con organizaciones non gubernamentales comprometíes na defensa del idioma, lo que llevó a la Fundación Caveda y Nava y a SUATEA a unviar un documentu y una quexa al organismu. “Cónstanos que la situación llingüística d’Asturies gocia de la mayor de les considerances dientro del Comité”, apuntó Ramón d’Andrés tres falar col so representante nel Estáu, Fernando Ramallo.