Estefanía Torres convirtióse esti miércoles na segunda eurodiputada asturiana de Podemos. La pixueta decidió tomar posesión del so cargu n’asturianu y va incorporase al intergrupu parllamentariu de Minoríes Llingüístiques.

La negativa del ministeriu de crear la especialidá docente y la propuesta de la conseyería pal currículu de Secundaria y Bachilleratu alarmen a l’Academia de la Llingua Asturiana (ALLA). La presidenta Ana María Cano, que va aconceyar con Podemos a pidimientu d'esta formación, apunta que la falta d’oficialidá ta “nel tresfondu” d’esta situación “llamentable” y esixe a los partíos políticos posicionase a favor d’esti marcu xurídicu pa nun condenala al so desaniciu.

La banda de punk-folk Skontra ta estos díes trabayando na grabación del que va ser el so cuartu álbum d’estudiu, de nome ‘Foguera’. La llingua asturiana va tener un pesu mayor nesti discu autoeditáu que va ver la lluz en mayu y nel que collabora Fernando Madina, cantante de Reincidentes.

La “agresión” que vive la materia de Llingua Asturiana en Bachilleratu cola propuesta de borrador de currículu de la conseyería pa esta etapa educativa lleva a SUATEA a convocar a los maestros a una asamblea. Ésta va tener llugar el miércoles nel IES Aramu d’Uviéu y va preceder a otra xeneral pol fechu de que “la situación de degradación de la materia ye compartida con otres”.

Jorge Uría protagonizó la charra mensual d’Ástura nel Atenéu Obreru de Xixón, que trató sobre ‘Les romeríes asturianes al aniciu del sieglu XX’. L’historiador apuntó que nesta época estos festexos revitalizáronse pero, al empar, empezaron a alteriase de forma acelerada.

Nacho González, covoceru d’Equo Asturies, afirmó esti miércoles que la so formación defende la cooficialidá del asturianu “ensin ambigüedaes”. Los ecoloxistes van acudir en solitariu a les Nacionales depués de nun llegar a bon puertu la so propuesta de converxencia con Podemos, organización cola que sí van compartir espaciu en delles candidatures municipales.

Los planes de la Conseyería d’Educación, Cultura y Deporte pa la entrada de la LOMCE en Bachilleratu supondríen un recorte del 75 por cientu de les hores de Llingua Asturiana. Iniciativa pol Asturianu saca esta conclusión del borrador de currículu unviáu a los centros educativos asturianos.

El videu de promoción de l’Asociación Queseros Artesanos Principado de Asturias, asoleyáu la selmana pasada, escaeció l’usu del asturianu. Esti fechu que yá se repitió n’otres campañes asemeyaes de productos con tantu raigañu como la sidra o la xata roxa ye pa la Xunta pola Defensa de la Llingua Asturiana (XDLA) un error a la hora de vender nel esterior.

L’ambigüedá de Podemos Asturies con respeuto a la oficialidá del asturianu y gallego-asturiano lleva al 56 por cientu de los nuesos usuarios a concluyir que nun ye una prioridá pa la formación. El so secretariu xeneral, Daniel Ripa, evitó otra vuelta posicionase sobre esta cuestión nuna entrevista de Justo Braga nel programa ‘Vidas públicas, vidas privadas’ de TPA.

El Serviciu de Normalización Llingüística de Mieres nun tien actividá dende la entrada del 2015, según alerta Iniciativa pol Asturianu. Esta organización reclama al Conceyu que “se responsabilice y vuelva a ponelu en marcha”, y esixe una partida nos presupuestos municipales pal mesmu.