La candidatura de les Asamblees Abiertes d'Estudiantes de la Universidá d'Uviéu foi la única presentada a les eleiciones.

Lidia Freire garra la presidencia del Conseyu d'Estudiantes de la Universidá d'Uviéu en sustitución de Jorge Fernández Iglesias, mentes qu'Elena Quintana releva a Xana Sarah Ebrecht na ayalguería y César Muñiz Argüelles a Víctor González Lorenzo, na secretaría. Pese a nun esistir candidaturas alternativas, el Reglamentu del Conseyu d'Estudiantes indica qu'han de facese votaciones igualmente, que tuvieron llugar el llunes.

El martes 25 de xunetu ye la fecha escoyida por Felpeyu pal conciertu especial pol so 25 aniversariu. Amás, la banda va aprovechar esta cita encuadrada nel Festival Arcu Atlánticu pa presentar el so trabayu últimu, ‘Cerquina’, y poner a la venta’l discu.

Esti llunes echó a andar una edición nueva, la sesta, del ‘Veranu Lliterariu’, actividá qu’entama la Casa de la Llingua de Corvera cola fin de promover la llectura infantil en llingua asturiana. Inaciu Galán lleó la so obra ‘Nel, el coríu que nun sabía nalar’ a la reciella.

Celébrase'l XL Festival de la Sidra de Nava.

Esta fin de selmana concéntrense la mayor parte de les actividaes del certame sidreru, que vien dende'l martes programando eventos. Asina, ente les previstes güei, destaca'l tornéu de bolos qu'acueye la bolera del Muséu de la Sidra a les 19 hores.

Cuatro Gotes Producciones nun pudo rexistrar los estatutos de la empresa por tar redautaos en llingua asturiana, según denuncia Iniciativa pol Asturianu. El Rexistru Mercantil obligó a esta sociedá a presentar una copia de los mesmos en castellanu.

Un 52 por cientu de los usuarios d’Asturies.com nun sofiten el fallu del xuráu del Princesa de Asturias de la Concordia, que foi pa la Xunión Europea (XE). Mentes, un 32 por cientu de los participantes en 'Conceyu Abiertu' diz nun tar interesáu nestos gallardones.

Van desendolcase esti branu.

El concursu de canción asturiana celebróse mientres los meses de mayu y xunu.

Lorena Corripio y Celestino Rozada relevaron a Liliana Castañón y Carlos Velasco como vencedores de Concursu de Canción Asturiana Cuenca del Nalón, qu'entama la productora A Mansalva cola collaboración del Conceyu de Llaviana y l'Asociación Cultural Trazaraíces. La edición destacó pol ésitu de públicu en toles sesiones del eventu, que vivía la so segunda edición.

El desemplegu cai a niveles del 2010.

Xunu zarróse n'Asturies con 3.893 paraos menos, asitiándose'l total de desemplegaos en 75.460 persones, lo que supón una mengua del 4,91 por cientu en comparanza col mes anterior. Ésti ye’l datu más baxu rexistráu dende agostu del 2010, cuando se contabilizaron 72.956 ciudadanos ensin trabayu.

Doce estudiantes y una doctoranda de la University of California Riverside trabayaron con esti material del Museú del Pueblu d'Asturies pa una esposición dixital.