Dixitalícense 125 cartes d'emigrantes asturianos residentes en México

Doce estudiantes y una doctoranda de la University of California Riverside trabayaron con esti material del Museú del Pueblu d'Asturies pa una esposición dixital.

Covadonga Lamar, profesora de Sociollingüística nel Departamentu d'Estudios Hispánicos en dicha universidá, acompañó a los alumnos nesta xera pal proyeutu d'humanidades dixitales con Omeka, un repositoriu dixital de documentos. El miércoles pasáu tuvieron nel Muséu del Pueblu d'Asturies pa dixitalizar, trescribir y facer una esposición dixital con 125 cartes d'emigrantes asturianos en México, d'ente'l 1885 y el 1940.

Tolos alumnos que participaron nesti trabayu son descendientes d'inmigrantes n'Estaos Xuníos d'orixe mexicanu. Pudieron acceder a 125 cartes de les 13.320 que tien l'archivu del Muséu del Pueblu d'Asturies, siendo les más antigües del 1827 y les más recientes del 1978.

Nos meses últimos esti fondu aumentó de manera considerable, recibiendo la donación d'una correspondencia d'una familia del conceyu de Ribeseya con cinco fíos en Cuba y México, qu'abarca dende'l 1919  al 1949. Tamién adquirió 42 copiadores de cartes d'un emigrante de Cabrales en México, nos que dexó una copia de toles qu'él escribió, tanto les rellacionaes col so trabayu como les qu'unvió a los sos familiares, ente'l 1887 y el 1903, que sumen 8.820 cartes, de manera aproximada.