Felpeyu va presentar ‘Cerquina’ el 25 de xunetu con un conciertu especial pol 25 aniversariu

El martes 25 de xunetu ye la fecha escoyida por Felpeyu pal conciertu especial pol so 25 aniversariu. Amás, la banda va aprovechar esta cita encuadrada nel Festival Arcu Atlánticu pa presentar el so trabayu últimu, ‘Cerquina’, y poner a la venta’l discu.

“Va ser un conciertu especial que finalmente tamién va servir de presentación de 'Cerquina', con presencia d’antiguos miembros del grupu y collaboraciones, na que vamos tocar los temes del discu nuevu y un percorríu polos más emblemáticos del grupu nestos 25 años, con un enfotu especial nos cantaos”, adelanta Ruma Barbero, percusionista y miembru fundado de Felpeyu. Asina, van xubise a les tables del escenariu de la Plaza Mayor xunto colo seis miembros actuales de grupu los ex componentes Cástor y Félix Castro, Xel Pereda, Isidro Suárez y Xuan Nel Expósito, que dexara hai poco la banda, anque grabó un tema en ‘Cerquina’.

Otra manera, van ser parte tamién d’esta cita tan esperada Rubén Bada, Ramón González, Ángel Ruiz, la Banda Gaites LaKadarma y Andrea Joglar como solista de gaita. El conciertu va empezar a les 22 hores y la xente interesao va poder mercar nel llugar ‘Cerquina’ nun puntu de venta que va instalar nel llugar Felpeyu, que darréu va comenzar cola so distribución en tiendes.

Tres el conciertu de Xixón, la banda folk tien confirmada una fecha en Piedrasblancas el 5 d’agostu. Va ser nel Valey Centru Cultural de Castrillón, a les 20.30 hores, con entraes a 5 euros.

Grabación d'un videoclip

‘Cerquina’ va sacase en CD y, per primer vegada, en vinilu depués de que se completara la campaña de cuestación popular entamada pa ello por Felpeyu na plataforma Verkami. Necesitábense 4.000 euros y finalmente recaudáronse 4.980 euros, perres de más que la banda invirtió na grabación d’un videoclip del cantar ‘Escaecimientu’, compuesta basándose nel cantar popular ‘Axuntábense’, que va presentase próximamente.