Aconceyamientu a trés bandes pa impulsar el corredor atlánticu

Los conseyeros d'Infraestructures d'Asturies, Galicia, y Castilla y Lleón ponen en común el llabor individual fechu de manera coordinada pa treslladalu al Gobiernu estatal y a Europa.

Alejandro Calvo, responsable de Medio Rural y Cohesión Territorial, y Ethel María Vázquez, d'Infraestruturas e Mobilidade de Galicia, y María González Corral, de Movilidad y Transformación Digital de Castilla y Lleón, caltuvieron esta tarde un alcuentru telemáticu a trés bandes pa tratar sobre'l corredor atlánticu nel que les trés comunidaes coincidieron na so voluntá d'intensificar el trabayu pal desendolcu d'esta infraestructura. Na mesma revisáronse los documentos comunes fechos y que recueyen les actuaciones necesaries pal proyeutu nestos territorios del noroeste peninsular.

Nel casu concretu d'Asturies tratáronse de midíes precises recoyíes na Allianza poles Infraestructures. L'alcuerdu foi celebrar próximamente un alcuentru nuevu nel que se pondrán en común les respeutives estratexes de les infraestructures loxístiques.

La intención ye unificar el llabor que se desendolcó de forma separtada pero coordinada, en cuanto a oxetivos y parámetros, pa treslladalu al Gobiernu estatal y a la Xunión Europea, cola fin de que se pueda avanzar y actualizar el Plan Direutor del Corredor Atlánticu. "Damos un pasu más", esplicó Calvo, que confirmó que "tuvimos la ocasión de revisar tola documentación qu'individualmente caúna de les comunidaes desendolcamos, evaluando cuáles son les necesidades pa desarrollar el corredor atlánticu y pa poder ponelu en común y esto se convierta nun documentu de prioridaes".

Financiación nos PXE

Valoró que, per primera vez, el corredor atlánticu cuente con financiación suficiente y comparable a la de otras zonas d'España pal añu qu'entra, 1.648 millones d'euros de los Presupuestos Xenerales del Estáu polos 1.695 del mediterraneu. A xuiciu del conseyeru, esti fechu supón un avance efeutivu.

Na semeya, Calvo con un mapa abiertu nel ordenador coles infraestructures del corredor atlánticu.