La llingua asturiana foi protagonista principal na FIDMA’l sábadu

El sábadu 20 d’agostu del 2022 ye una fecha nueva histórica nel procesu de normalización del asturianu. La Feria Internacional de Muestres d’Asturies (FIDMA), l’eventu más multitudinariu del país, que nesta sesentena quinta edición superó’l so récor de visitantes con 741.014, celebró per primer vegada’l Día de la Llingua Asturiana.

La propuesta d’Iniciativa pol Asturianu tuvo’l sofitu de la Cámara de Comerciu de Xixón, que participó activamente na xornada amplia d’actividaes que programó’l coleutivu. Ésta principió a les 11.30 hores con un actu na entrada principal del Recintu Ferial Luis Adaro, frente al bustu de Gaspar Melchor de Xovellanos, cola presencia d’Álvaro Alonso Ordás, direutor de la FIDMA, qu’abrió’l mesmu con unes pallabres n’asturianu nes que deseó qu'esti Día de la Llingua Asturiana fora'l primeru de munchos.

Intervieno darréu Iván Llera, presidente d’Iniciativa pol Asturianu, que recordó qu’ésta yera la quinta edición na que’l coleutivu taba presente nun eventu “na que nos sentimos mui a gustu”. “Pensamos que yera’l momentu de que l’asturianu trescendiera del nuesu stand, yá lo fai porque munchos stands vienen usando l’asturianu con normalidá a lo llargo del tiempu, pero queríamos que se reforzara, que se visibilizara y llevar esa normalidá qu’hai ente la sociedá asturiana col asturianu a tola Feria de Muestres”, apuntó, al tiempu qu’agradeció a la Cámara de Comerciu de Xixón “la bona receptividá” y les facilidaes daes.

Depués d’enumerar les actividaes previstes, finó asegurando que “l’asturianu tien que vese como dalgo positivo. Nesti día tenemos que reivindicar más que nunca l’asturianu, da-y normalidá, reivindicar la oficialidá, y facer qu’esta xornada sirva tamién pa garrar toes ilusión de cara al añu que vien, que tenemos eleiciones que toos sabemos lo importantes que van ser”.

Césareo Marqués, pregoneru de L’Amuravela, y Xosé Manuel Fernández, de La Regalina, foron los siguientes en garrar el micrófonu pa dar una amuesa del so facer nestes dos fiestes énte’l públicu presente, que foi creciendo según diben llegando visitantes a la FIDMA, y les diferentes autoridaes y representes políticos. Acudieron a esti primer actu del Día de la Llingua Asturiana’l direutor xeneral de Política Llingüística, Antón García; el presidente de l’Academia de la Llingua Asturiana (ALLA), Xosé Antón González Riaño; el conceyal d'Actividá Física, Deporte y Distritu Rural, José Ramón Tuero; la responsable de la Oficina de Normalización Llingüística de Xixón, María Xosé Rodríguez López; la diputada nel Congresu y coordinadora autonómica de Podemos, Sofía Fernández Castañón; y ediles d’Uviéu (Diego Valiño del PSOE y Ana Taboada de Somos), Llanera, Bimenes, Llaviana, Carreñu, Llangréu y Mieres, amás d’otros representantes del PSOE, PP, Podemos y Izquierda Xunida.

Presencia del idioma nel pasáu y homenaxe a Xovellanos

Peslló esti primer actu Inaciu Galán, vocal de Rellaciones Institucionales d’Iniciativa pol Asturianu, que apuntó que “poner en marcha esti día ye una forma de potenciar la rellación de la Feria col asturianu y la cultura asturiana, una rellación que vien de mui atrás”. Asina recordó que foi nuna clausura de la FIDMA, nel 1967, “cuando Avelino Moro, Daniel Palacios y Luis Argüelles propunxeron la creación del Pueblu d’Asturies, güei un muséu de referencia. Luis Adaro acoyó la propuesta con gustu”, un añu depués fúndase, “y la presencia del asturianu yá taba ehí: un cartelu recibía a los visitantes escritu nesta llingua”.

Foi tamién nel 1968 cuando se celebró na instalación “el primer concursu de lliteratura asturiana en prosa”, teniendo llugar “na sede de la Cámara de Comerciu unos meses más tarde” la entrega de premios. “Por eso güei intentamos, con esa tradición de cuidáu de la cultura asturiana, impulsala hacia’l futuru y tener un día de referencia pa l’asturianu dientro l’eventu pel que más asturianos y asturianes pasen cada añu”, siguió Galán, qu’entregó a los responsables de la Cámara de Comerciu de Xixón un cartelu del Primer Día de la Llingua Asturiana na FIDMA a Alonso Ordás como recuerdu d’esta histórica xornada.

Pa finar, fíxose una ufrienda florar a Xovellanos, que “nel 1790 propunxó la creación de l’Academia de la Llingua Asturiana, qu’acabaría llegando nun primer intentu nel 1919 y que se recuperaría definitivamente nel añu 1980, yá en Democracia. Foi él el que dixo, y poco se reivindica aquelles pallabres sobre l’asturianu: Es la lengua viva de nuestro pueblo, todos la mamamos por decirlo así con la primera leche, va pasando tradicionalmente de padres a hijos y se continúa de generación en generación”, recordó. Tamién rescampló, ente otres xeres, “la influencia sobre la so hermana, Xosefa Xovellanos, y con ello a la primer muyer que conocemos con obra nesta llingua, considerada amás la meyor autora, home o muyer, de les lletres asturianes del sieglu XVIII. Sirva esti homenaxe a Gaspar como un homenaxe a Xosefa”.

El presidente actual de dicha Academia de la Llingua Asturiana, González Riaño, y Llera encargáronse de poner el ramu nel bustu del ilustráu mientres sonaben los acordies del himnu del país.

Percorríu pel recintu y recuerdu a Menéndez Pidal

Una visita institucional per diferentes espacios con presencia del asturianu y medios de comunicación foi la siguiente actividá. El pabellón del Gobiernu y el de Xixón, con esposiciones billingües, foron los primeros, pa siguir pel de Llangréu, Mieres, VerAsturies y Iniciativa pol Asturianu, onde finó’l percorríu.

Nel trayeutu fíxose una parada frente al bustu de Ramón Menéndez Pidal, onde se fixo una nueva ufrienda floral. Fernando Padilla, direutor xeneral de Planificación Llingüística y Normalización na llexislatura anterior, encargóse de recordar la so trayeutoria, apuntando que “ye mui importante y de xusticia esti pequeñu homenaxe que facemos a la so figura nesti Día de la Llingua Asturiana na Feria de Muestres d’Asturies pa se conoza más allá de los ámbitos académicos”. “Nun escaezamos la importancia d’Asturies na vida de Menéndez Pidal, porque foi nel conceyu de Ḷḷena, nel pueblu de Payares, onde entamó’l formientu de la gran obra pidaliana”, llugar onde tamién “nació’l so interés pol asturianu y les sos primeres primeres publicaciones sobre la materia”, rellató.

Una amuesa de xuegos tradicionales nel Muséu del Pueblu d’Asturies, una entrevista por internautes a González Riaño y Llera, una visita guiada al recintu museísticu apegáu al recintu ferial, un repartu de material de la Oficina de Normalización Llingüística nel puestu d’Iniciativa pol Asturianu, un recital poéticu en collaboración cola Asociación d’Escritores d’Asturies, una representación de la obra de títeres ‘Capiellín Colloráu’ nel pabellón del Conceyu de Llangréu, l’alderique ‘Etnografía y Llingua Asturiana: un repás a la tradición cultural’ nel puestu de VerAsturies, una tastia de sidra natural nel del Conceyu de Mieres y una entrega de los premios del primer concursu lliterariu pol 8-M ‘Ensin muyeres nun hai idiomes’ nel d'Iniciativa pol Asturianu completaron l’axenda del Primer Día de la Llingua Asturiana na FIDMA.

Na semeya, Galán entrega'l cartelu del Primer Día de la Llingua Asturiana a Alonso Ordás en compañía de Llera, Xuan Pandiella y Alma Hidalgo.