“Ye un día d’ilusión, allegría y celebración”, espresa Llera

Iniciativa pol Asturianu organizó con ésitu'l primer Día de la Llingua Asturiana na FIDMA col oxetivu de "dar muncha más visibilidá al asturianu".

"Tamos mui contentos", apuntaba Iván Llera, depués de la visita institucional del sábadu al Recintu Ferial Luis Adaro, con "una mui bona acoyida". "Ye un día d'ilusión, allegría y celebración", espresaba.

Agradeció'l sofitu de la Cámara de Comerciu de Xixón "dende un primer momentu" y rescampló los homenaxes a Gaspar Melchor de Xovellanos y Ramón Menéndez Pidal como los momentos "más emotivos". "Lo qu'intentemos ye dar muncha más visibilidá al asturianu. Ye una primer esperiencia y vamos repetir", aseguró.

Entiende que "ye una cosa que facía falta" y valoró que la xornada "axuntara a un montón de xente con responsabilidaes como conceyales, diputaos, representante del Gobiernu d'Asturies y de gobiernos de conceyos", posibilitando que "s'escenifique un poco esi sofitu a la oficialidá. Tamos nun momentu mui importante, tenemos unes eleiciones municipales y autonómiques, y ye onde tenemos que trabayar pa consiguir esa mayoría que nesta llexislatura nun pudo ser".

Puestu del coleutivu

Ésti yera'l quintu añu nel qu'Iniciativa por Asturianu cuenta con un puestu na Feria Internacional de Muestres d'Asturies (FIMDA), un espaciu que cede a 13 empreses que trabayen n'asturianu pa que puedan ufrir los sos productos y servicios nel eventu. Son Puru Remangu, Cuatro Gotes Producciones, Tiza y Peonza, Trabe, Cerveza Caleya, Cartonajes Vir, 9000 Soluciones, Acuto Xuegos, Nordés Móvil, Aitrad, Asturcón Seguridá, Ediciones Radagast y Ringo Rango.

"Cada vez son más les empreses que collaboren con nós", rescampló Llera, qu'aseguró tar satisfechu de "la respuesta de la xente" y de "partíos políticos y autoridaes que siempre pasen pol stand". "El públicu recíbelo mui bien, tienen curiosidá, pregunten, falen contigo..., y tenemos una receición mui bona. Vamos siguir trabayando por que l'asturianu tea en más stands y nosotros vamos siguir comprometíos cola Feria", añadió'l presidente d'Iniciativa pol Asturianu, qu'enantes recordaba la presencia del idioma nos años últimos en pabellones como'l de'l Gobienu o'l de Xixón, ente otros.

Na semeya, miembros d'Iniciativa pol Asturianu y autoridaes el sábadu tres la barra de chigre tradicional reproducida nel pabellón del Gobiernu na FIDMA. Llera asítiase nel centru ente Inaciu Galán, vocal de Rellaciones Internacionales del coleutivu, y Antón García, direutor xeneral de Política Llingüística, y detrás de María Xosé Rodríguez López, responsable de la Oficina de Normalización Llingüística de Xixón.