González Riaño empondera a la direición de la FIDMA “pol mensaxe d’integración y pluralidá col qu’enfocó'l Día de la Llingua Asturiana”

“Tien una importancia simbólica y práutica d’una entidá grande”, afirmó Xosé Antón González Riaño sobre’l primer Día de la Llingua Asturiana na Feria Internacional de Muestres d’Asturies (FIDMA). El presidente de l’Academia de la Llingua Asturiana (ALLA) emponderó a la direción del eventu más multitudinariu del país “pol mensaxe d’integración y pluralidá col qu’enfocó” esta xornada.

“La Feria de Muestres d’Asturies nun ye un eventu anecdóticu n’Asturies, representa una demostración de lo que ye la realidá social y económica, y inclusive tien una gran trescendencia política”, espresó a Asturies.com frente al pabellón del Conceyu de Llangréu, una de les paraes de la visita institucional celebrada’l sábadu. “Dende esi puntu de vista, el que la Feria asumiere esta propuesta de facer el Día de la Llingua Asturiana y que se vinculare direutamente la direición de la Feria con esti eventu creo que ye un síntoma de los llogros y los avances algamaos en sectores, como l’económicu, que podríen ser más refractarios o nun entender na so xusta midida les implicaciones sociales y culturales de la llingua asturiana”, añadió.

Nesi sen, confesó que “felicité personalmente al direutor de la Feria pol mensaxe d’integración y pluralidá con qu’enfocó esti primer Día de la Llingua Asturiana na Feria”, una felicitación que tamién treslladó a Iniciativa pol Asturianu pola organización de la xornada. Sobre’l día escoyíu, un sábadu, cuando, xunto los domingos, más visitantes s’averen al Recintu Ferial Luis Adaro, apuntó que “too casa pa que la visualización d’esti Día de la Llingua Asturiana sía lo más grande posible. El día ye l’acertáu y la dinámica y la propuesta d’actividaes al rodiu del día son especialmente oportunes”.

Pa finar, entrugáu por una cada vegada mayor presencia del idioma nos puestos na FIDMA d’instituciones y empreses, señaló que “hai sectores del ámbitu económicu que van asumiendo una realidá, que siendo una realidá inicialmente con unes característiques cultures, depués tresciende tamién a aspeutos económicos”. Asina, “la recuperación de la llingua asturiana, nel so casu la oficialidá de la llingua asturiana, tien que rellacionase tamién con actividá economica. Dende esti puntu de vista, podemos considerar el primer Día de la Llingua Asturiana un síntoma de qu’esa perspectiva económica ta empezando a reconocese polos axentes qu’interpreten la realidá económica n’Asturies”, aseguró González Riaño.

Na semeya, González Riaño, segundu pela derecha, xunto col direutor de la FIDMA, Álvaro Alonso Ordás; y Inaciu Galán y Xuan Pandiella, d'Iniciativa pol Asturianu, mientres l'actu inaugural del Día de la Llingua Asturiana na FIDMA frente al bustu de Gaspar Melchor de Xovellanos asitiáu na entrada principal del Recintu Ferial Luis Adaro.