“La mayor parte de les coses que se faen n’Asturies empiecen a reflexar la realidá y l'asturianu forma parte d'ella”, afirma García

El direutor xeneral de Política Llingüística, Antón García, foi’l representante del Gobiernu nel primer Día de la Llingua Asturiana na Feria Internacional de Muestres d’Asturies (FIDMA). “La mayor parte de les coses que se faen n’Asturies empiecen a reflexar la realidá y l’asturianu forma parte d’esa realidá social”, aseguró.

El de Tuña acudió'l sábadu a la inauguración frente al bustu de Gaspar Melchor de Xovellanos y a la primer parte de la visita institucional entamada por Iniciativa pol Asturianu, pa llueu atender un compromisu nel mesmu recintu ferial y tornar a la parte final del percorríu. “Nos últimos años la presencia de la llingua asturiana foi entrando poco a poco na Feria y creo que tien un simbolismu especial que s’institucionalice una xornada, un Día de la Llingua, col apoyu de la Cámara y la Feria y de munches empreses y instituciones qu’esponen nella”, aseguró a Asturies.com.

“Ye’l primer añu, ye un pasu alantre importante, y lo que importa ye, como dicía’l direutor de la Feria nes pallabres que dixo na inauguración, que sía’l primeru de munchos años”, rescampló. D’igual forma señaló que “poco a poco, la mayor parte de les que coses que se faen n’Asturies empiecen a reflexar la realidá y l’asturianu forma parte de la realidá social y ye importante que se pueda ver n’acontecimientos como ésti”, con tanta repercusión.

Y ye que la FIDMA algamó’l récor de visitantes nesta sesentena quinta edición, con 741.014. “Faise en Xixón pero ye una feria de toa Asturies y tolos asturianos identificámonos con ella. Forma parte de la tradición familiar d’Asturies dir a la Feria polo menos una xornada y disfrutar de tolo qu’ofrez”, apuntó.

Na semeya, García nel pabellón del Gobiernu nun momentu de la visita institucional.