Ésti ye'l programa del primer Día de la Llingua Asturiana na FIDMA

Iniciativa pol Asturianu y la Cámara de Comerciu de Xixón entamen el sábadu esta xornada de reivindicación del idioma nel Recintu Ferial Luis Adaro y nel Muséu del Pueblu d'Asturies.

La llingua asturiana va ser protagonista mañana na LXV Feria Internacional de Muestres d'Asturies (FIDMA). Célebrase per primer vegada'l Día de la Llingua Asturiana, con estes actividaes a lo llargo del día:

• 11.30 hores: visita institucional encabezada por Iván Llera, presidente d’Iniciativa pol Asturianu, con representantes institucionales del Gobiernu y de conceyos. Amás de percorrer dellos puestos que faen usu del asturianu, la ruta va incluyir un homenaxe a les figures de Gaspar Melchor de Xovellanos y Ramón Menéndez Pidal, que cuenten con un bustu dientro del recintu ferial.
• 12 hores: amuesa de xuegos tradicionales asturianos nel tendayu del Muséu del Pueblu d’Asturies cola collaboración de La Buelga.
• 16.30 hores: Llera y Xosé Antón González Riaño, presidente de l'Academia de la Llingua Asturiana, respuenden entrugues a internautes nel puestu de 'MiGijón'.
• 17 hores: visita guiada al Muséu del Pueblu d'Asturies.
• 17.30 hores: repartu de materiales de la Oficina de Normalización Llingüística de Xixón nel puestu d'Iniciativa pol Asturianu.
• 18.30 hores: recital poéticu na sala Mirador en collaboración cola Asociación d'Escritores d'Asturies.
• 19 hores: representación de la obra de títeres ‘Capiellín Colloráu’ nel pabellón del Conceyu de Llangréu.
• 19.30 hores: alderique ‘Etnografía y Llingua Asturiana: un repás a la tradición cultural’ nel puestu de VerAsturies.
• 20 hores: tastia de sidra natural nel puestu del Conceyu de Mieres y entrega de los premios del primer concursu lliterariu pol 8-M ‘Ensin muyeres nun hai idiomes’ nel puestu d'Iniciativa pol Asturianu.