“Los currículos lleven a un paralís de tolo que ye la normalización llingüística”, asegura Colodrón

“Abre posibilidaes p’ameyorar la situación del asturianu nel enseñu y cumplir cola Llei d’Usu”, apunta SUATEA sobre la ‘Llei Celaá’
El Gobiernu podría afayar l’enseñu del asturianu a la Llei d’Usu cola aprobación de la Llei Celaá
Confírmase l’ausencia del asturianu na etapa d'Educación Infantil
La materia d'asturianu pierde una hora en cuartu de la ESO y gana dos en cada cursu de Bachilleratu
“Un Gobiernu que diz tar a favor de la oficialidá presenta unos currículos que caltienen a les nuestres llingües na marxinalidá”, denuncia SUATEA

13 Mayu, 2022 por Pablo R. Guardado

Inicie sesión o rexístrese pa espublizar comentarios

Los borradores de los currículos d’Infantil, Primaria, Secundaria y Bachilleratu adaptaos a la LOMLOE que presentó la Conseyería d’Educación “lleven a un paralís de tolo que ye la normalización llingüística”, afirma Xosé Lluis Colodrón, responsable de la Secretaría de Llingua Asturiana de SUATEA. Asegura que la situación “ye especialmente sangrina n’Infantil”, onde l'idioma nun tien presencia.

Na etapa de 0 a 6 años l’asturianu y el gallego-asturiano ta ausente “por cuestiones económiques y polítiques”, espresa. “Nun se tien en cuenta nin la Llei d’Usu nin l’Estatutu d’Autonomía”, rescampla, normes que, apunta, nun apaecen nel preámbulu –nel casu de l’autonómica nun cita l’artículu 4–, lo que Colodrón considera enforma “grave” nun momentu clave de la formación del alumnu.

Nel restu de etapes señala que “too sigue igual”. “Caltiénse la optatividá en llugar de la voluntariedá y el global na ESO sufre un retrocesu d’una hora”, llamenta.

En Bachilleratu, mentes, vívese un aumentu de 2 hores en cada cursu, pasando de 1 a 3, pero “llegó a haber 4”, y en Primaria, nun hai cambios, con Llingua Asturiana y Lliteratura compitiendo con Cultura Asturiana. “Los currículos lleven a un paralís de tolo que ye la normalización llingüística”, sentencia Colodrón.

Un esmolecimientu que’l Sindicatu Unitariu Autónomu de Trabayadores de la Enseñanza d’Asturies (SUATEA), que prepara un comunicáu, va treslladar el xueves qu’entra nun conceyu concertáu previamente cola conseyera de Cultura, Política Llingüística y Turismu, Berta Piñán. Tamién cuenta con axuntase con Podemos y Izquierda Xunida (IX) la selmana qu’entra pa tratar esti asuntu.

“La oficialidá ye’l marcu llegal que, magar nun garantizar la normalización, sí sienta les bases pa ello, pa frenar esta situación d’estancamientu que vivimos”, termina’l representante del sindicatu educativu.

Na semeya, la conseyera d'Educación, Lydia Espina –de pie nel centru–, nuna visita al Centru Públicu d'Educación Básica de Colombres.