“Un Gobiernu que diz tar a favor de la oficialidá presenta unos currículos que caltienen a les nuestres llingües na marxinalidá”, denuncia SUATEA

L’ausencia del asturianu y del gallego-asturiano n’Infantil, que “supón amás una ruptura drástica na transición de la llingua materno-ambiental a la institucional-escolar con bultables consecuencies negatives nel procesu de deprendimientu”, y la falta de cambios en Primaria, Secundaria y Bachilleratu lleva a SUATEA a falar de “marxinalidá” de les llingües propies. Recalama equidá col castellanu na enseñanza.

Como anunciara’l responsable de la Secretaría de Llingua Asturiana, Xosé Lluis Colodrón, a Asturies.com el vienres, el sindicatu educativu asoleyó un comunicáu nel que detalla la situación na que queda l’enseñu del asturianu y del gallego-asturiano colos proyeutos de currículos nuevos adaptaos a la LOMLOE. La situación más esmoleciente ye la d’Infantil, onde se “incumple dafechu la nuestra llexislación autonómica”.

“Nel preámbulu, que formalmente ye onde s’especifiquen los fundamentos de fechu y de derechu, nun hai nenguna mención al artículu 4 del Estatutu d’Autonomía d’Asturies” nin tampoco a la Llei d’Usu y Promoción del Bable/Asturianu, “que nel so artículu 10 se dedica especialmente al currículu y obliga a garantizar l’enseñu de les nuestres llingües de forma voluntaria”. En concreto afita que “nel exerciciu de les sos competencies, el Principáu d’Asturies ha garantizar l’enseñu del bable/asturianu en tolos niveles y graos, respetando sicasí la voluntariedá del so aprendimientu”.

Per otru llau, nel articuláu “tampoco nun se regula nengún conteníu de les nuestres llingües nin siquier de manera equivalente a la llingua estranxera, Inglés”. “Esta ausencia curricular supón amás una ruptura drástica na transición de la llingua materno-ambiental a la institucional-escolar con bultables consecuencies negatives nel procesu de deprendimientu, nel procesu de recuperación llingüística y na falta de continuidá nos conteníos ente la etapa EI y Primaria”, llamenta’l Sindicatu Unitariu y Autónomu de Trabayadores de la Enseñanza d’Asturies (SUATEA).

Siempre optativa

Sobre la situación en Primaria, rellata que “sigue col tratamientu curricular anterior y una carga horaria marxinal, una hora y media selmanal, énte les 5 de Castellán o les 3-4 d’Inglés”, y en Secundaria “mérmase la carga horaria una hora nel cómputu selmanal global pasando de 9 a 8 hores” y calteniéndose como n’optativa. Mentes, en Bachilleratu, “aumenta de 1 hora a 3 hores (cola LOE llegó a tener 4)”.

En Secundaria y Bachilleratu la Llingua Asturiana y el Gallego-asturiano sigue compitiendo con otres asignatures como una segunda llingua estranxera, Taller d’Economía Aplicada o Dixitalización, ente otres, “contrariamente a lo dispuesto por l’artículu 4 del nuestru Estatutu Autonomía onde prescribe la voluntariedá del so deprenzax, non la so optatividá”. Una optatividá que tamién se da Primaria, onde les families han escoyer ente la materia o Cultura Asturiana.

“Un Gobiernu que diz tar a favor de la oficialidá presenta unos currículos que paralicen l’avance hacia ella y caltién les nuestres llingües na situación de marxinalidá que vien sufriendo dende hai cuasi 40 años de gobiernos prácticamente siguíos del PSOE”, denuncia SUATEA, qu’añade que acabar con esta situación de paralís ye urxente si nun queremos qu’esanicie’l nuestru patrimoniu llingüísticu. Magar que la oficialidá ye’l marcu xurídicu afayaízu pa recuperamos d’esi paralís, curricularmente podemos arimanos a ella”.

Asina demanda al Executivu “la modificación del proyeutu de currículu d’EI pa que recueya l’enseñu de les nuestres llingües n’equidá col castellán” y “la modificación de los currículos de Primaria, ESO y Bachilleratu onde se recueya un tratamientu horariu, de conteníos y metodolóxicu asemeyáu al castellán”.

Na semeya, la conseyera d'Educación, Lydia Espina, nel conceyu d'esta mañana colos comités de direutores d'Infantil y Primaria, díes depués de la presentación de los proyeutos de currículos, pa conocer les sos impresiones, esclariar posibles dulds y p'analizar la necesidá d'introducir dalgunas matizaciones si fora necesario. Tamién lo fixo amás colos de Secundaria.