“Abre posibilidaes p’ameyorar la situación del asturianu nel enseñu y cumplir cola Llei d’Usu”, apunta SUATEA sobre la ‘Llei Celaá’

La Llei Orgánica de Modificación de la LOE (LOMLOE), la conocida como ‘Llei Celaá’, “abre posibilidaes p’ameyorar la situación del asturianu nel enseñu”, considera Xosé Lluis Colodrón, de SUATEA. Entiende que la reorganización del currículu ye una bona oportunidá pa que la conseyería cumpla "cola Llei d’Usu”.

Tres analizar con detalle’l proyeutu de llei, aprobáu’l martes nel Conseyu de Ministros y pendiente entovía de pasar el trámite del Congresu, el responsable de la Secretaría de Llingua del sindicatu educativu apunta que con respeto a les materies de Llingua Asturiana y Gallego-asturiano “abre un poco más les posibilidaes de los que tenemos agora al contar con más competencia pa definir el currículum”. Dependerá entós del Gobiernu asturianu un meyor encaxe de l’asignatura nes diferentes etapes educatives, eliminando, por exemplu, la optatividá en Secundaria y Bachilleratu.

“Ye una bona oportunidá pa cumplir cola Llei d’Usu”, asegura, al tiempu que considera que la redaición de la LOMLOE da pie a que l’asturianu pueda ser llingua vehicular. Anguaño, nestes dos etapes educatives nun se garantiza l’enseñu al facela competir con otres materies.

D’igual forma, la reorganización podría aprovechase, na so opinión, p’aumentar el númberu d’hores llectives de la materia. “L’horariu nun tien qué ser el que ye agora”, demanda.

En definitiva, la posición en que quede la Llingua Asturiana y el Gallego-asturiano “va depender de la voluntá política qu’haya d’avanzar”. Nesi sen, recuerda que “cola oficialidá nun tendríamos que tar con estes cuestiones”.

“Una oportunidá perdida”

El Sindicatu Unitariu y Autónomu de Trabayadores de la Enseñanza d’Asturies (SUATEA) considera que la LOMLOE “ye una oportunidá perdida p’avanzar hacia la escuela que queremos”, pero apunta que aspeutos positivos, como terminar cola segregación del alumnáu, la calificación de la materia de Relixón y les reválides, ente otros. Na parte más negativa, “lo poco valiente que ye colos conciertos educativos”.

“La LOMLOE supón una meyora al respeutive de la LOMCE porque esanicia los sos aspeutos más lesivos, pero ye claramente insuficiente pa quien esperábemos un compromisu claru ya inequívocu cola escuela pública, un compromisu con una escuela llaica, inclusiva, equitativa, compensadora de desigualdaes, coeducativa, democrática, comprometida con un mundu más xustu y respetuosa coles llingües y cultures territoriales”, apunta’l sindicatu educativu.

Na semeya, la conseyera d'Educación, Carmen Suárez Suárez, esta mañana nuna visita al colexu de Veiga de Rengos xunto col direutor del centru, Tito Casado.