El Gobiernu podría afayar l’enseñu del asturianu a la Llei d’Usu cola aprobación de la Llei Celaá
- “L’Academia y la Conseyería d’Educación compartimos l’análisis y les soluciones a la enseñanza del asturianu”, afirma González Riaño
- “Cola ‘Llei Celaá’ la conseyería tien la oportunidá de reorganizar les enseñances pa dar meyor cabida al asturianu”, diz CC OO
- “Abre posibilidaes p’ameyorar la situación del asturianu nel enseñu y cumplir cola Llei d’Usu”, apunta SUATEA sobre la ‘Llei Celaá’
- SUATEA demanda la equiparación curricular de les llingües d’Asturies col castellanu y l’inglés na aplicación de la Llei Celaá
- “Los currículos lleven a un paralís de tolo que ye la normalización llingüística”, asegura Colodrón
|
20 Payares, 2020 por Pablo R. Guardado
- Inicie sesión o rexístrese pa espublizar comentarios
El Congresu aprobó esti xueves la Llei Orgánica de Modificación de la LOE (LOMLOE), conocida como Llei Celaá, una norma que permitiría al Gobiernu afayar l’enseñu del asturianu a la Llei d’Usu y Promoción del Bable/Asturianu, polo que dexaría de ser optativa pa pasar a voluntaria en toles etapes. El reglamentu tien que dir agora al Senáu pa ser ratificáu y entraría a valir nel cursu próximu.
La disposición adicional trentena octava ‘Llingua castellana, llingües cooficiales y llingües que gocien de proteición llegal’ afita nel so puntu quintu que “aquelles comunidaes autónomes nes qu’esistan llingües cooficiales que nun tienen esi calter en tol so territoriu o llingües non oficiales que gocien de proteición llegal podrán ofreceles, nos términos que determine la so normativa reguladora”. Ye’l casu d’Asturies, onde nin l’asturianu y nin el gallego-asturiano son oficiales según l’Estatutu d’Autonomía,
La Conseyería d’Educación tien asina la oportunidá d’afayar l’enseñu de la materia a la Llei d’Usu, qu’establez la so voluntariedá nel sistema educativu. Asina, l’artículu 3 marca que “ye oxetu de la presente Llei”, nel so apartáu b, “garantizar la enseñanza del bable/asturianu, nel exerciciu de les competencies asumíes pol Principáu d’Asturies, atendiendo a los principios de voluntariedá, gradualidá y respetu a la realidá sociollingüística d’Asturies”.
Anguaño l’asignatura de Llingua Asturiana y Gallego-asturiano compite con Cultura Asturiana en Primaria, y con una segunda llingua estranxera o otres materies en Secundaria y Bachilleratu. La Llei Celaá permite agora que les autonomíes decidan el so encaxe nel currículu educativu, cola intención dende’l Gobiernu d’apostar por cumplir la llei y garantizar la voluntariedá del so enseñu, según treslladó a l’Academia de la Llingua Asturiana la conseyera Carmen Suárez Suárez nos sos aconceyamientos.
Los sindicatos educativos tamién vienen reclamando que cola reorganización que se faiga de la materia tenga más hores llectives. Nestos momentos en Bachilleratu reduzse a una hora selmanal.
Na imaxe, la ministra d'Educación y Formación Profesional, Isabel Celaá, aplaude tres la votación pola que s'aprobaba siguir cola tramitación de la LOMLOE.
Efrén d'Andrés
