La materia d'asturianu pierde una hora en cuartu de la ESO y gana dos en cada cursu de Bachilleratu

Les asignatures de Llingua Asturiana y Gallego-asturiano van siguir siendo optatives en Secundaria y Bachilleratu y namái ganen en carga horaria na etapa última. Los currículos nuevos adaptaos a la LOMLOE quiten una hora en cuartu de la ESO y dan dos en Bachilleratu, pasando de 1 a 3 cuando nel pasáu llegó a haber 4.

La conseyera d’Educación, Lydia Espina, y el direutor xeneral d’Ordenación, Evaluación y Equidá Educativa, David Artime, presentaron esta mañana’l desendolcu curricular nestes dos etapes, xusto una selmana depués del d’Infantil y de Primaria, con ausencia de la Llingua Asturiana na primera y col mesmu modelu qu’anguaño na segunda. En Secundaria y Bachilleratu tampoco nun hai cambios, sacante la carga horaria, yá que sigue siendo optativa en competencia con otres materies.

Hasta esti cursu na ESO la materia contaba con 2 hores selmanales, menos en cuarto que contaba con 3. Agora pasen los cuatro cursos a tener 2, esto ye, piérdese 1 al baxar de 9 a 8 en tola etapa.

En Bachilleratu’l probe pesu de l’asignatura, con 1 hora selmanal, maquíllase agora aumentando hasta les 3 en caún de los dos cursos. Sicasí, entovía ta perbaxo de les 4 hores que tenía l’alumnáu de Llingua Asturiana y Gallego-asturiano nel pasáu.

Dende la conseyería rescamplen que los currículos “afonden nel aprendizaxe competencial que s’impartirá yá dende Infantil, rixéndose por principios tresversales como la igualdá, que ponen el focu na dixitalización, atienden a la diversidá del alumnáu y incrementen la optatividá. El conocimientu de la realidá asturiana, incluyida la llingua, o’l trabayu por proyeutos y ámbitos son dalgunas de las premises que se siguió na concreición autonómica de la LOMLOE”.

Na semeya, Espina y Artime.