La Comisión d’Educación del Congresu aprueba la PNL qu’encamienta al Gobiernu a crear la especialidá docente

La Proposición Non de Llei presentada por Xuníes Podemos pa la modificación de los reales decretos que permita crear la especialidá de Llingua Asturiana y Gallego-asturiano salió alantre na Comisión d'Educación y Formación Profesional del Congresu con 19 votos a favor y 15 en contra. El diputáu murcianu de VOX Joaquín Robles y la popular Paloma Gázquez centraron el so discursu n’atacar al asturianu.

En concreto, la iniciativa defendida por Sofía Fernández Castañón encamienta al Gobiernu estatal a modificar un artículu, el 2.3, d’estos testos “pa que se reconozan n’Educación Primaria y Educación Secundaria Obligatoria, el Bachilleratu, la Formación Profesional y les Enseñances de Réxime Especial, les especialidaes docentes de les llingües propues d’aquelles comunidaes que, anque nun tengan reconocíes diches llingües como oficiales, dispongan de proteición llegal y manifiesten la so voluntá de desendolcales”. "Ye dalgo mui cenciello", aseguró la xixonesa.

D'esta manera preténdese "correxir una discriminación llaboral que lleva décades precarizando a trabayadores públicos", negando-yos "derechos llaborales, dignidá y estabilidá na so actividá docente". Nel cursu pasáu, apuntó Castañón, "278 profesores d'asturianu y de gallego-asturiano tuvieron nel aula ensin tener reconocida la especialidá qu'imparten", lo que se traduz en que "la práutica totalidá d'esi personal docente ta n'interinidá y n'alta proporción de places a media xornada, hasta un 71 por cientu".

La diputada quixo “poner en valor” el llabor d’estos profesionales “y agradece-ylo”, y reclamó al restu de parllamentarios que “si-yos resulten ayenos a los derechos llingüísticos, que creo nun deberíen”, tuvieren en cuenta que’l tema que taba tratando referíase a “derechos llaborales”.

Gustavo Bueno, el “prau d’arrastre” y desconocimientu sobre Xovellanos

Na fixación de posiciones de los grupos parllamentarios tomó primero la pallabra Inés Sabatés, de Más País-EQUO, perteneciente al Grupu Plural, que tresmitió’l so apoyu a la PNL. Nuna intervención breve rescampló “la riqueza de la llingua”.

Nuna llinia más agresiva presentóse Robles, de VOX. El murcianu citó a Gustavo Bueno y a los sos cien bables y cien quesos, y acusó a Xuníes Podemos de “querer homoxeneizar pa construyir un supuestu fechu identitariu que-yos permita negar la españoleidá d’Asturies a imitación de lo qu’asocedió nel País Vasco”.

Darréu calificó l’asignatura d’asturianu de “verdadera maría” y atrevióse a dicir que “la llingua común y propia de los asturianos nun ye nin foi nunca otra distinta que l’español. La llingua y la lliteratura asturiana ye la mesma que nel restu d’España”, poniendo d’exemplu a Feijoo, Clarín, Alarcos, Bueno y al propiu Xovellanos, colo qu’amosó asina’l so desconocimientu sobre l’ilustráu xixonés. “¿Ónde tán eses supuestes creaciones lliteraries escrites nuna llingua inventada?”, entrugó, faciendo de siguíu’l vieyu chiste del “prau d’arrastre” o “camín da leite”.

La diputada del PP por Asturies, la malagueña Gázquez, criada en Madrid, sumóse al ataque de Robles al asturianu. Depués de citar la creación de la Llei d'Usu, escaeciendo'l papel xugáu pol Partíu Asturianista (PAS), faló d’un supuestu inventu del idioma y de la oficialidá como una "imposición de la estrema izquierda cola connivencia del Partido Socialista, que lo utiliza como cortina de fumu pa tapar la grave situación económica d'Asturies".

Nel pocu tiempu que dedicó al asuntu al que se refería la PNL afirmó que “tendría sentíu si hubiera demanda nos centros educativos pa estudiar la llingua asturiana, pero nun la hai”. “Pretenden dir contracorriente; imponer una especialidá que los alumnos nun opten por ella. Nun ye una demanda social, la tendencia ye a la baxa, y fíxese, por muncho que-yos duela, que’l porcentaxe de matriculación onde realmente medra ye en Relixón”, finó.

“Discursu incalificable”

El noreñés García Morís, últimu n’intervenir, refirióse al “discursu de les dereches, concretamente del PP” como “incalificable dafechu”. Asina, acusó a Gázquez de “siguir les consignes de VOX, utilizando unos argumentos sobre la propia llingua y cultures asturiana que me producen absoluta vergoña. Nun tien xacíu que vengan vustedes equí a utilizar una demanda tan xusta como ésta, la de la especialidá del profesoráu, pa dar una imaxe d’Asturies con esos argumentos tan insultantes qu’utilizaron güei equí”.

“Tamos confundiendo alderiques”, insistió’l socialista, que faló del lo arriquecedor que foi la so formación n’asturianu nel CP Condado de Norña, de terceru a octavu d’EXB. “Lo que yo nun sabía entós yera que –dixo cambiando de la llingua castellana a l’asturianu– aquellos maestros y maestres que daben asturianu y cambiaben tolos años yeren profesores interinos que nunca diben sacar la so plaza y concursar pola especialidá d’asturianu, porque esa especialidá nun esistía y llamentablemente depués de tantu tiempu siguimos na mesma situación”, espresó.

Pa finar, aseguró, otra vuelta en castellanu, que “hai un compromisu firme del Partido Socialista, tanto dende’l Gobiernu d’Asturies como dende’l Ministeriu d’Educación, pa sacar alantre esta cuestión. Tamos falando única y esclusivamente de los derechos d’un coleutivu de profesores qu’imparte nesta materia y que redunda tamién nel beneficiu del alumnáu qu’opta por estudiar asturianu”.

Al final de la comisión votóse la PNL, el sétimu puntu del orde del día, aprobándose por 19 votos a favor, 15 en contra y nenguna astención.

Na semeya, un momentu de la votación de la PNL, colos diputaos favoratibles cola mano llevantada.