Podemos nun quier qu’entame’l cursu viniente ensin el reconocimientu de la especialidá docente d'asturianu

“Ye una cuestión d’iguar una desiguadá llaboral”, afirmó Sofía Fernández Castañón, nueva coordinadora de Podemos, sobre’l reconocimientu de la especialidá docente de Llingua Asturiana y Gallego-asturiano depués d’aconceyar con CC OO Enseñanza y SUATEA. Demanden que se dea'l pasu de cara al cursu viniente.

La Comisión d'Educación y Formación Profesional del Congresu aprobó n’ochobre una Proposición Non de Llei presentada por Xuníes Podemos pa la modificación de los reales decretos que permita crear la especialidá docente. Magar el votu favoratible del so sociu nel Gobiernu estatal, el PSOE, trés meses depués l’Executivu nun dio entá esti pasu.

“Venimos demandándolo dende qu’entramos nes instituciones, dende’l 2016, y lo que tuvimos falando colos dos sindicatos ye qu’esta modificación s’execute pa que nun entame’l siguiente cursu ensin tener correxida esta fonda desigualdá llaboral que discriminal al profesoráu docente d’asturianu”, apuntó Castañón. La tamién diputada en Madrid, que tuvo acompañada por Nuria Rodríguez, parllamentaria de la Xunta Xeneral, y Tamara Schulz, responsable de Servicios Públicos de Podemos, recordó qu’hai 400 persones nel país “nesta situación de desciminación llaboral”.

Otra manera, nel aconceyamientu con Comisiones Obreres (CC OO) Enseñanza y el Sindicatu Unitariu Autónomu de Trabayadores de la Enseñanza d'Asturies (SUATEA) tamién s'analizó'l procedimientu express qu’habilitó la Conseyería d’Educación pa cubrir les baxes por COVID-19. "L’alministración tendría d’habilitar en procedimientu electrónicu y actualizar la información de manera diaria pa que tou’l profesoráu de la bolsa d’interinos ya interines pueda tener accesu a la mesma a la hora de tomar les sos decisiones llaborales", considera Podemos.

Na semeya, Fernández Castañón nuna intervención el mes pasáu.