Santori algama’l XXIII Premiu Máximo Fuertes Acevedo d’ensayu

‘42.553: depués de Buchenwald’ ye la obra merecedora del XXIII Premiu Máximo Fuertes Acevedo d’ensayu, integráu nos Premios Lliterarios que concede la Conseyería d’Educación y Cultura. El so autor ye l’escritor y estudiosu de la nuesa lliteratura Xuan Santori.

Luis Casteleiro, María del Pilar Fernández González, Elena de Lorenzo y Ana Vanessa Gutiérrez González, ganadora l’añu pasáu con 'El paisaxe nuestru', conformaron el xuráu del premiu, que presidió, como ye vezu, el direutor xeneral de Planificación Llingüística y Normalización, Fernando Padilla. Tres aconceyar esta mesma selmana, decidieron fallar el gallardón por mayoría por ‘42.553: depués de Buchenwald’, el conocíu campu de concentración nazi, presentada baxo’l nomatu de ‘Waldemar’.

L’acta del xuráu Máximo Fuertes Acevedo valora “el xuegu de ficción y realidá consiguío al traviés de la xuntura d’imaxe, testimoniu y documentación y la dimensión internacional qu’adquier la obra”. D’esta forma, el Doctor en Filoloxía, una de les voces más destacaes sobre la nuesa lliteratura y primer persona en presentar una tesis n’asturianu tramitada dafechu nesi idioma (‘El papel de los escritores del Surdimientu na recuperación del asturianu: la visión del escritor’), nel añu 2012, lleva’l so primer gallardón nos Premios Lliterarios de la conseyería.

El d’ensayu ye’l segundu que se falla na edición del 2017, toos ellos con una recompensa de 3.000 euros. El pasáu 20 d’ochobre diose a conocer al ganador del IX Alfonso Iglesias de cómic: Alberto Vázquez García, pola so obra ‘Los llazos coloraos’.