Entréguense n’Uviéu los Premios Lliterarios y el Nel Amaro de teatru

El Paraninfu de la Universidá d’Uviéu acueye esti añu la entrega de los Premios Lliterarios que concede, en cinco estayes, la Conseyería d’Educación y Cultural. La novedá d’esta edición ye la incorporación del I Premiu y Festival Nel Amaro de Teatru Profesional en Llingua Asturiana o Gallego-asturiano.

El conseyeru Genaro Alonso y Fernando Padilla, direutor xeneral de Planificación Llingüística y Normalización, van presidir una gala na que per primer vegada una autora va recoyer dos gallardones. Trátase de Berta Piñán, merecedora de X Premiu María Xosefa Canellada de lliteratura infantil y xuvenil por ‘Vida nel campu’, y del XXXVIII Premiu Xosefa Xovellanos de novela con ‘Como la muda al sol d’una llagartesa’.

El restu de premiaos son Alberto Vázquez García, que ganó’l IX Alfonso Iglesias de cómic por ‘Los llazos coloraos’; Xuan Santori, que llevó’l XXIII Premiu Máximo Fuertes Acevedo d’ensayu con ‘42.553: depués de Buchenwald’; y Pablo X. Suárez, que mereció’l XXIII Premiu Xuan María Acebal de poesía por ‘Little Babilonia’. Toos ellos lleven un troféu y una recompensa de 3.000 euros.

‘Llázaro de Tormes’

Nesti 2017, amás d’estos gallardones que tienen como oxetivu consolidar la llingua asturiana como vehículu d’espresión lliteraria, entamóse’l Premiu y Festival Nel Amaro de Teatru Profesional en Llingua Asturiana o Gallego-asturiano “pa consolidar, arriquecer y  prestixar la llingua y la cultura asturianes, na creencia, amás, de qu’actuaciones como ésta contribúin de forma eficaz a dinamizar l’actividá cultural de la comunidá  autónoma, y n’especial un aspectu tan importante de la mesma como ye’l del arte dramáticu en toles sos variantes”, que llevó Carlos Alba ‘Cellero’ por ‘Llázaro de Tormes’. Esti monólogu, estrenáu nel xixonés Teatru Xovellanos nel 2012, trátase d’una adaptación del clásicu castellanu anónimu ‘La vida de Lazarillo de Tormes y de sus fortunas y adversidades’.  

Felipe Santiago encargóse de la direición escenénica, mentes que’l testu contó cola revisión llingüística del escritor Milio Rodríguez Cueto. La recompensa d’esti premiu consiste nuna pieza artística y la promoción y espardimientu del espectáculu nos medios de comunicación públicos y nos eventos entamaos pol propiu Gobiernu.

El comienzu de la gala ta previstu pa les 19 hores y va contar con una actuación musical de Silvia Quesada y Alfredo González.

Na semeya, troféu del I Premiu y Festival Nel Amaro de Teatru Profesional en Llingua Asturiana o Gallego-asturiano.