Vázquez García lleva’l IX Premiu Alfonso Iglesias de cómic

La Conseyería d’Educación y Cultura comenzó a fallar los Premios Lliterarios correspondientes al añu 2017. L’Alfonso Iglesias de cómic ye’l primeru del que se conoz ganador: el mierense Alberto Vázquez García cola so obra ‘Los llazos coloraos’, centrada na posguerra.

El xuráu formáu por Luis García Iglesias ‘Luis Navazo’, vencedor de la edición pasada; Carolina González Rodríguez, autora de cómics; y José Antonio García Fernández, xefe del Serviciu de Planificación Llingüística y Normalización, baxo la presidencia del direutor xeneral de Planificación Llingüística y Normalización, Fernando Padillo, decidió por unanimidá conceder el gallardón al trabayu de Vázquez García, que se presentó a concursu baxo’l nomatu ‘El Argentino’. L’acta del fallu destaca la “estraordinaria ellaboración del guión y el trabayu completu d’investigación que construyen un retratu fiel de la posguerra n’Asturies’.

‘Los llazos coloraos’ trata sobre’l procesu d’industralización del país, centrándose nos años que siguieron a la Guerra Civil. L’autor mierense emplega’l llápiz pa desarrollar la historia d’esti trabayu nel que destaca’l so tratamientu sobriu del color.

Vázquez García ye un artista gráficu d’amplia trayeutoria profesional. Trabayó como dibuxante pal diariu ‘La Nueva España’ y el mediu dixital ‘Asturnews’, y vien desenvolviendo un llabor destacada como diseñador de murales, cómics y cartelería pa delles ONX, como Soldepaz-Pachakuti, Médicos Mundi o Secretariado Gitano, ente más otres.

Amás, ye autor de dellos trabayos documentales de traza memorialista,ente los que pueden destacase ‘34-35, diez asturianos nel exiliu francés’ y ‘Poca ropa, la llucha contra la dictadura franquista en Mieres’. Ye la primer vegada que lleva’l Alfonso Iglesias, gallardón que tien una recompensa de 3.000 euros.