Vincent García, protagonista del ensayu de Santori ganador del Fuertes Acevedo, acude a la presentación del llibru

El polesu Vincent García Riestra, últimu sobreviviente español del campu de concentración de Buchenwald, viaxa a Asturies p’acudir a la presentación del llibru ‘42.553: depués de Buchenwald’. Él ye’l protagonista del ensayu de Santori ganador del Fuertes Acevedo.

Nacíu nel añu 1925 y residente na población occitana de Periguers, García Riestra yera'l númberu 42.553 del campu de concentración asitiáu na redolada de la ciudá alemana de Weimar, que pese a nun ser un campu d'esterminiu sí cobró numberoses víctimes polos trabayos forzaos, los esperimentos médicos y les condiciones de vida de les prisioneros. 250.000 persones pasaron por él ente'l 1937 y el 1945, la mayoría por cuestiones polítiques.

Xuan Santori centra nesti asturianu el so ensayu ‘42.553: depués de Buchenwald’, obra merecedora del XXIII Premiu Máximo Fuertes Acevedo d’ensayu, gallardón encuadráu nos Premios Lliterarios qu’entama la Conseyería d’Educación y Cultura. El xuráu valoró “el xuegu de ficción y realidá consiguío al traviés de la xuntura d’imaxe, testimoniu y documentación y la dimensión internacional qu’adquier la obra”.

Receición institucional

Trabe encargóse de la edición de la obra, que se va presentar mañana a les 19.30 hores nel Muséu Arqueolóxicu d’Asturies, cola presencia del autor y de García Riestra. Amás, el polesu va ser recibíu por autoridaes del Gobiernu y va participar nuna charra-alderique colos escolinos de segundu y cuartu de Secundaria del IES Padre Feijoo de Xixón sobre la so vivencia dientro d’un homenaxe del centru a tolos deportaos asturianos que va consistir na plantación d’un árbol n’alcordanza.

Precisamente, el de La Pola Siero dedicó tola so vida dende la so lliberación en contar la so esperiencia en centros educativos franceses cola fin de que nun s’escaezan los crímenes y la llocura del fascismu. García Riestra ye consideráu un héroe nel Estáu francés, y ente les sos numberoses reconocencies tien la condecoración de más rangu de la República Francesa, la Legion d'Honneur.