Berta Piñán gana’l so segundu Premiu María Xosefa Canellada

‘Vida nel campu’ ye la obra merecedora del X Premiu María Xosefa Canellada de lliteratura infantil y xuvenil. La so autora ye Berta Piñán, que yá se llevó la primer edición d’esti gallardón perteneciente a los Premios Lliterarios con ‘Arroz, agua y maíz’.

La Casa Conceyu de Cabranes acoyó ayeri nesta ocasión la reunión del xuráu del premiu, presidíu por Fernado Padilla, direutor xeneral de Planificación Llingüística y Normalización, y conformáu pol ganador del añu pasáu, Adolfo Camilo Díaz; la escritora y especialista en lliteratura infantil y xuvenil Maite González Iglesias; l’asesora téunica del Serviciu de Planificación Llingüística y Normalización, Juncal García Velasco; l’alcalde Gerardo Fabián; y el fíu de la escritora que da nome al gallardón, Alonso Zamora. Por unanimidá decidieron conceder el María Xosefa Canellada al trabayu la ‘Vida nel campu’, presentáu baxo’l nomatu ‘Teyín’, que resultó ser Piñán.

L’acta reconoz “una obra noble qu’escuende denuncia, pero que nun s’enllena con proclames innecesaries”, na que “el llector participa de los mesmos descubrimientos que los personaxes y dexa la valoración ética pal remate de la llectura”. La escritora de Cañu, una de les voces más destacaes del Segundu Surdimientu, lleva una recompensa de 3.000 euros y algama per segunda vegada esti gallardón tres ser la ganadora de la primer edición con 'Arroz, agua y maíz' (2008).

El María Xosefa Canella ye’l tercer de los cinco Premios Lliterarios, qu’entamen la Conseyería d’Educación y Cultura, que se fallen. Enantes, conocióse qu’Alberto Vázquez García llevó’l IX Alfonso Iglesias de cómic pola so obra ‘Los llazos coloraos’, y Xuan Santori’l XXIII Premiu Máximo Fuertes Acevedo d’ensayu por ‘42.553: depués de Buchenwald’.

La entrega de los Premios Lliterarios va celebrase’l 14 d’avientu nel Paraninfu de la Universidá d’Uviéu nuna ceremonia na qu’esti añu se suma’l I Premiu y Festival Nel Amaro de Teatru Profesional en Llingua Asturiana o Gallego-asturiano.