Manuel García Menéndez consigue’l XXXIX Premiu Xosefa Xovellanos

|
Obres ganadores del Premiu Xosefa Xovellanos de novela

‘El visitante impropiu’, una novela policiaca de Manuel García Menéndez, ye la obra ganadora del XXXIX Premiu Xosefa Xovellanos. El xuráu del gallardón falló’l miércoles por unanimidá la quinta y cabera estaya de los Premios Lliterarios 2018, la más veterana.

Como ye vezu, Fernando Padilla, direutor xeneral de Planificación Llingüística y Normalización, presidió’l grupu d’espertos encargáu de valorar les obres presentaes a concursu. Nesta ocasión tuvo conformáu por Berta Piñán, ganadora de la edición pasada con ‘Como la muda al sol d’una llagartesa’; los escritores Pablo Texón y Pablo Antón Marín Estrada; el profesor de la Facultá de Filosofía y Lletres, Leopoldo Sánchez; y la filóloga del Serviciu de Planificación Lingüística y Normalización, Lourdes Álvarez.

Por unanimidá decidióse que la obra merecedora del Xosefa Xovellanos fora ‘El visitante impropiu’ al reconocer nella “una novela ambiciosa con gran oficiu narrativu que representa una propuesta poco habitual na lliteratura asturiana pol so trabayu d’ambientación minuciosu y brillante, amás de tener una trama construyida hábilmente”, según destaca l’acta. Presentada baxo’l nomatu de Dana Folgueres, al abrir la plica’l ganador resultó ser García Menéndez.

‘El visitante impropiu’ trátase d’una novela policiaca ambientada a finales el sieglu XIX, protagonizada por un miembru del Cuerpu de Vixilancia, que comienza en Madrid pero que trescurre mayoritariamente n’Uviéu, ciudá de nacencia del escritor con venceyos en Tinéu, lo que lu lleva a escribir tamién na variante occidental del idioma. Precisamente esti añu ganó tamién el XV Concursu de Cuentos Curtios del Conceyu de Cangas del Narcea na estaya d’asturianu occidental col rellatu ‘L’home que caéu nun bardión de lata’.

3.000 euros de recompensa

El Xosefa Xovellanos ye’l quintu gallardón que se falla de los cinco Premios Lliterarios qu’entrega la Conseyería d’Educación y Cultural, con una recompensa de 3.000 euros pal ganador de cáuna de les estayes. El restu de gallardonaos son Anxelu González Fernández, con ‘Cacique blancu’ (X Premiu Alfonso Iglesias de cómic); Lluis Aique Iglesias Fernández, con ‘Invisible’ (XI Premiu María Xosefa Canellada de lliteratura infantil y xuvenil); Pablo Texón, con ‘Allumamientu’ (XXIV Premiu Xuan María Acebal de poesía); y Damián Barreirdo, con ‘Asturploitation’ (XXIV Premiu Máximo Fuertes Acevedo d’ensayu).

Contador Estadistiques