El Paraninfu de la Universidá d’Uviéu acueye la entrega de los Premios Lliterarios 2018 y del Nel Amaro de teatru

|
Cartelu Premios Lliterarios 2018

Esti xueves va celebrase nel Paraninfu de la Universidá d’Uviéu la gala d’entrega de los Premios Lliterarios 2018 nes sos cinco estayes y del II Premiu y Festival Nel Amaro de teatru. Manuel García Menéndez, Pablo Texón, Damián Barreiro, Lluis Aique Iglesias, Anxelu González y Higiénico Papel Teatro son los ganadores.

La Conseyería d’Educación y Cultura entama estos gallardones cola mira d’afitar la llingua asturiana como vehículu d’espresión lliteraria de primer orde. Los cinco premios lliterarios cuenten con una recompensa de 3.000 euros caún, mentes que’l de teatru algama los 6.000 euros y un compromisu de promoción de la obra teatral por parte del Gobiernu. Tolos ganadores lleven tamién una pieza artística.

El más veteranu, el Premiu Xosefa Xovellanos de novela, qu’algama la so trentena noveda edición, foi pa García Menéndez por ‘El visitante impropiu’, una novela policiaca ambientada a finales el sieglu XIX en Madrid y Uviéu. El poemariu ‘Allumamientu’, de Texón, escritu mientres la so paternidá, consiguió’l XXIV Premiu Xuan María Acebal de poesía.

La estaya d’ensayu foi pa Barreiro por ‘Asturploitation’, trabayu centráu nel sector audiovisual y na posibilidá de crear una industrial al so rodiu que sirviera a los asturianos pa sentise reflexada nella. Ésti ye’l segundu Premiu Máximo Fuertes Acevedo del periodista, que yá llevara la ventena edición del gallardón nel 2014 por ‘Caleya Sésamu: el papel de la televisión na tresmisión interxeneracional de la llingua’.

El XI Premiu María Xosefa Canellada de lliteratura infantil y xuvenil ganólu Iglesias por ‘Invisible’, una historia de mieu protagonizada por un adolescente que quier ser invisible pal restu de la sociedá. Completen los gallardones lliterarios el X Premiu Alfonso Iglesias de cómic, que mereció González por ‘Cacique blancu’, obra que narra la historia real d’un asturianu emigráu a América.

El más mozu de los concursos, el Premiu y Festival de Teatru Profesional en Llingua Asturiana y Gallego-asturiano, que vive la so segunda edición, foi pa Higiénico Papel Teatro por ‘Hansel y Gretel’. Esta obra trátase d’un visión personal del cuentu clásicu de los hermanos Grimm interpretada por Félix Corcuera, Carlos Dávila y la direutora Laura Iglesia que tornó al asturianu Xuan Fernandi.

Actuación d’Héctor Braga

La gala d’entrega de los premios va dar comienzu a les 19.30 hores nel Paraninfu de la Universidá d’Uviéu, asitiáu nel edificiu históricu de la institución, y nella va tar presente’l conseyeru Genaro Alonso. Nel mesmu Héctor Braga va ufrir una actuación musical.

Contador Estadistiques