García Menéndez bebe de la novela prieta nórdica en 'El faru de Gram'

Esti llibru abre la coleición 'Zafir' de Saltadera.

Manuel García Menéndez, ganador del últimu Premiu Xosefa Xovellanos de novela con 'El visitante impropiu', ta acabante d'espublizar 'El faru de Gram', obra al más puru estilu del nordic noir, la novela prieta nórdica. La histora trescurre na isla del mesmu nome, una de les munches que formen Dinamarca, que cuenta con un vida apacible en comunidá: unes poques cases onde vive una pescadora, un xubiláu, una escritora y poca xente más.

Esta tranquilidá vese alteriada de sópitu pola llegada d’un grupu criminal que necesita’l faru pa cometer un atracu llargamente estudiáu y planificáu. Los habitantes de la isla nun tienen nada que temer si obedecen les órdenes, pero non siempre les coses pasen como taba previsto.

Nacíu n'Uviéu nel 1962, esti llicenciáu n'Historia tien espublizao obres de lliteratura infantil, como 'Corcuspín el Rozcayeiru' (1984) y 'Delina nel vaḷḷe’l Faloupu' (1985), pa depués pasar un tiempu en silenciu hasta la novela 'La sienda del amigu feliz' (2013), que se completa cola premiada 'El visitante impropiu', pendiente entovía d'espublizar. Por venceyu familiar y sentimental, García Menéndez pertenez al grupu d’escritores de Tinéu, del que formen parte autores como Rafa Lorenzo, Xuan Bello, Sabela Fernández, Miguel Rojo, Ḷḷuís Fernández, Pilar Arnaldo o Antón García.

Presentación n'Uviéu

Esta tarde, a les 19 hores, va presentase 'El faru de Gram', con un actu previstu a les 19 hores na uvieína Librería Cervantes. Nel mesmu va tar presente l'autor y Aida Escuderu, que va convidar a la llectura.