Piñán fai historia al llevar tamién el Premiu Xosefa Xovellanos de novela

La ganadora del X Premiu María Xosefa Canellada de lliteratura infantil y xuvenil, Berta Piñán, lleva tamién el XXXVIII Premiu Xosefa Xovellanos de novela. D’esta forma l’autora de Cañu conviértese na primera en ganar dos de los Premios Lliterarios el mesmu añu.

El 20 de payares conocíase que Piñán algamaba per segunda vegada na so carrera’l María Xosefa Canellada, nesta ocasión por ‘Vida nel campu’ –llevó la primer edición con 'Arroz, agua y maíz' (2008)–. Diez díes depués esta escritoria, considera una de les voces más destacaes del Segundu Surdimientu, recibe otra bona noticia al ganar el so primer Xosefa Xovellanos pola obra ‘Como la muda al sol d’una llagartesa’.

“Destaca  la complexidá narrativa d’una historia bien trabada con numberosos personaxes que caltienen l’interés a lo llargo la llectura de la obra. La novela, partiendo d’un fechu criminal, percuerre distintos aspectos de la sociedá asturiana d’anguaño, sobre too del mundu rural”, apunta l’acta del xuráu, que tuvo presidíu por Fernando Padilla, direutor xeneral de Planificación Llingüística y Normalización, y formáu por Xulio Arbesú, ganador de la edición anterior; Laura Marcos; Miguel Rojo; y Juncal García Velasco, asesora téunica del Serviciu de Planificación Llingüística y Normalización. Piñán presentóse col nomatu de ‘Frida’ y lleva una recompensa de 3.000 euros.

Esti fallu completa los cinco Premios Lliterarios qu’entrega la Conseyería d’Educación y Cultura. Alberto Vázquez García ganó’l IX Alfonso Iglesias de cómic pola so obra ‘Los llazos coloraos’; Xuan Santori’l XXIII Premiu Máximo Fuertes Acevedo d’ensayu por ‘42.553: depués de Buchenwald’; y Pablo X. Suárez el XXIII Premiu Xuan María Acebal de poesía por ‘Little Babilonia’, amás del María Xosefa Canella de Piñán por ‘Vida nel campu’.

La entrega de los Premios Lliterarios va celebrase’l 14 d’avientu nel Paraninfu de la Universidá d’Uviéu nuna ceremonia na qu’esti añu se suma’l I Premiu y Festival Nel Amaro de Teatru Profesional en Llingua Asturiana o Gallego-asturiano, qu’algamó Carlos Alba ‘Cellero’ por ‘Llázaro de Tormes.