Educación y Cultura convoca los Premios Lliterarios del 2018

|
Premios Lliterarios 2017

El Boletín Oficial del Principáu d’Asturies (BOPA) espublizó esti miércoles la convocatoria de les cinco estayes de los Premios Lliterarios correspondientes al añu 2018. Tamién la resolución de les subvenciones a medios de comunicación pa la normalización del asturianu, que caltién la mesma partida que nel 2016 y 2017.

La recompensa pa los ganadores de los Premios Lliterarios va ser tamién la mesma: 3.000 euros. El 17 de setiembre ye’l día llende pa la presentación de los trabayos a concursu pa cuatro de les estayes que conformen esta iniciativa de la conseyería, esto ye, el Xosefa Xovellanos de novela, na so trentena novena edición; el Xuan María Acebal de poesía y el Máximo Fuertes Acevedo d’ensayu, na ventenu cuarta; y el María Xosefa Canellada de lliteratura infantil y xuvenil, na undécima.

Mentes, l’Alfonso Iglesias de cómic, que celebra la so décima edición, zarra’l plazu’l 3 de setiembre. Igual que nos años últimos, pa esti gallardón nun ye necesario presentar la historia completa, sinón que val con un proyectu inicial con una estensión mínima de quince páxines.

90.000 euros

La convocatoria de subvenciones a medios de comunicación pa la normalización social del asturianu y, nel so ámbitu, del gallego-asturiano, nun sufre modificaciones con respeuto a los dos años anteriores. Asina, les perres destinaes pa la conseyería pa esti fin ye de 90.000 euros, 10.000 más que nel 2015 pero 78.000 menos que nel 2013, cuando ascendió a 168.000 euros.

Entovía tán pendiente de salir, si nun hai novedaes, les ayudes pa la producción editorial y discográfica. Otra manera, la selmana pasada asoleyóse la convocatoria pa entidaes llocales pa la normalización del idioma al traviés de campañes, rotulación de les dependencies municipales, señalización de servicios públicos, rotulación toponímica, cursos, páxines web o imaxe corporativa, con una partida de 40.000 euros.

Na semeya, gala d'entrega de los Premios Lliterarios del 2017 celebrada nel paraninfu de la Universidá d'Uviéu.

Contador Estadistiques