Uviéu acueye una presentación nueva de 'El visitante impropiu'

El llibru de Manuel García Menéndez resultó ganador del últimu Premiu Xosefa Xovellanos.

Tres presentalu en mayu na VII Feria del Llibru y Discu n'Asturianu, actividá encuadrada dientro de la XL Selmana de les Lletres Asturianes, l'autor torna a participar nun actu n'Uviéu pa dar a conocer la so novela 'El visitante impropiu', editada por Impronta. Va ser nesta ocasión na Librería Cervantes, nun eventu programáu pa esta tarde a les 19 hores que va conducir Carlos González Espina.

La obra del García Menéndez ta ambientada na primavera del 1890, cuando l’inspeutor especial Marcos Engrueba, fíu d'asturianu, ye treslladáu de Madrid a Uviéu pa resolver un asesinatu. "A traviés de les páxines de 'El visitante impropiu' conocemos les idees y los métodos de Marcos Engrueba y cómo se rellaciona colos policíes que tienen que se poner baxo’l so mandu, pese a que lu consideren un intrusu, y con dellos personaxes de la sociedá uviedina a los que va tratando por trabayu o por fuelga. Y descubrimos les claves qu’en rellación col crime va dándonos la historia, contada de forma paralela, de Xulián Prieto, un mozu que ta a xornal na estación del Norte d’Uviéu", espliquen dende la editorial.