La promoción del asturianu medra en 201.000 euros nos Presupuestos, un aumentu del 11,8 por cientu

|
Llapiz proyeutu de Presupuestos 2020

El Proyeutu de Llei de Presupuestos Xenerales pal 2020 d'Adrián Barbón destina a la promoción del asturianu 1.904.630 euros. Esta candidá supón una medra del 11,8 por cientu, 201.000 euros más con respeuto a les cuentes actuales, aprobaes pol Gobiernu de Javier Fernández col sofitu de Podemos y Izquierda Xunida (IX).

La principal novedá ye l’anunciada partida pa la creación del Serviciu de Normalización Llingüística de la Universidá d’Uviéu, un total de 14.400 euros. Tamién hai la mesma dotación económica pa los d’Avilés, Llangréu, Ḷḷena, Cangas del Narcea, Corvera, Llaviana, Llanera y Grau-Candamu –en procesu de concursu-oposición–, amás de los agora inactivos del Cabu Peñes, Siero, Mieres, Samartín del Rei Aurelio, Castrillón y Ribeseya, mentes que los de la ‘Comarca de la Sidra’, Parque Histórico del Navia y Ozcos-Eo reciben 15.840 euros.

A l’Academia de la Llingua Asturiana (ALLA) van destinaos 220.000 euros y inclúinse dientro de los Presupuestos pal 2020 los 70.000 que la RTPA recibe pa la presencia de la llingua asturiana na so programación tres l’alcuerdu del añu pasáu. Otra manera, les partíes pa la promoción del asturianu y gallego-asturiano en medios de comunicación y la edición musical caltiénse en 100.000 euros y 20.000 euros, de manera respeutiva, al igual que la subvención a entidaes llocales en 50.000 euros, mentes que la de producción editorial baxa de 100.000 a 90.000 euros.

Ente les aiciones anunciaes pol Gobiernu tamién ta la "ellaboración y xestión de les convocatories de les pruebes de certificación correspondiente a los niveles de competencias en llingua asturiana".

Contador Estadistiques