Los Presupuestos dediquen a la promoción del asturianu 172.000 euros más, lo que supón una medra del 9,06 por cientu

El Gobiernu presentó'l proyeutu de llei de Presupuestos pal 2021, de 5.237 millones, lo que supón una medra del 10 por cientu con respeuto al exerciciu anterior. La promoción del asturianu cuenta con una partida de 2.077.271 euros, 172.641 más que nes cuentes actuales, lo que supón un 9,06 por cientu d’aumentu.

La criticada partida a la RTPA dende la Conseyería de Cultura, Política Llingüística y Turismu crece en 30.000 euros, pa pasar de 70.000 a 100.000 euros. Formaciones como Podemos o coleutivos como la Xunta pola Defensa de la Llingua Asturiana vienen reclamando que los conteníos n’asturianu y gallego-asturiano na televisión y radio públiques han salir del propiu presupuestu del ente.

Aúmentense en 5.000 euros les subvenciones a la producción editorial hasta asitiase en 95.000 euros, mentes que siguen conxelaes en 100.000 la de medios de comunicación. Nun va haber partida pa discos y retírase la de 30.000 a actividaes culturales d’entidaes privaes.

L’Academia de la Llingua Asturiana va recibir de los presupuestos asturianos 230.000 euros, 10.000 más. Mentes, los Servicios de Normalización Llingüística activos –queda fuera Siero con respeuto a esti añu– van contar con 5.000 euros más pa poner el total individual en 19.400 euros, a esceición d’Avilés qu’asciende hasta los 20.400; A Veiga y les entidaes qu’agrupen dellos conceyos como la ‘Comarca de la Sidra’ y la Fundación Parque Histórico del Navia aumenten tamién la so cantidá en 6.000 euros, polo qu’algamen los 21.840 euros caún.

La Universidá d’Uviéu torna a contar con una partida pal esperáu Serviciu de Normalización Llingüística, de 14.400 euros, mesma cantidá que s’incorporaba nes cuentes vixentes. Una novedá son los 24.000 euros colos que cuenta la Fundación Valdés Salas, mentes que se caltienen los 12.000 pa gallardones artísticos en llingua asturiana y auméntense de 25.000 a 39.000 los de los Premios Lliterarios.

No que respeuta a gastos de personal de la Direición Xeneral de Política Llingüística, éstos medren en 73.900 euros, mentes qu’en bienes corrientes y serviciu failo en 46.141 euros. D’esta forma, a les tresferencies corrientes dedíquense 933.120 euros, 52.600 euros más pa sumar esos 172.641 euros nos qu’aumenta la partida de promoción del asturianu.

Cuentes p'afrontar la crisis provocada pola pandemia

El proyeutu de presupuestu aprobáu güei pol Conseyu de Gobiernu, de 5.237 millones, ta concebíu, según apunten dende l’Executivu, pa superar los perxuicios sociales y económicos de la pandemia de COVID-19. Ye un 10 por cientu más que l’actual y inclúi un fondu de 100 millones p’apoyar los sectores más dañaos pola crisis sanitaria.

Les partíes previstes pa Sanidá, Educación y Servicios Sociales sumen 3.414 millones y la inversión productiva algama los 483,1 millones. Nel capítulu cultural, el proyeutu inclúi 600.000 euros p’actuaciones venceyaes col Prerrománicu y otros 400.000 pal plan ‘Uviéu, orixe del camín’ que complementa la programación del Xacobéu 2021.

Les comparecencies de las distintes conseyeríes pa esplicar les cuentes van desendolcase del miércoles viniente al día 16. El Plenu nel que se van votar les posibles enmiendes a la totalidá ta previstu pal 23 y, de pasar esti trámite, aprobaríense los Presupuestos el 30.

Na imaxe, la vicepresidenta de la Xunta Xeneral María Celia Fernández –el presidente Marcelino Marcos ta en cuarentena por contautu estrechu con un positivu de COVID-19– recibe d'Ana Cárcaba, conseyera de Facienda, el llápiz de memoria col proyeutu de llei de Presupuestos del 2021 pa empezar col trámite parllamentariu. Semeya obra d'Armando Álvarez.