“Los presupuestos son poco ambiciosos na cuestión llingüística”, afirma Iniciativa pol Asturianu

Iniciativa pol Asturianu nun ve recoyíes les sos espeutatives nel presupuestu del Gobiernu pa la promoción del asturianu. “Son poco ambiciosos na cuestión llingüística”, asegura’l so presidente Iván Llera, que nun entiende por qué tornen a salir de Cultura 70.000 euros pa la RTPA pa la creación de conteníos pal ente.

“Reconociendo l’aumentu de la partida dedicada al asturianu, pasando de 1.703.630 euros a 1.904.630 euros, el Presupuestu presentáu pol Gobiernu nun recueye les espeutatives d’Iniciativa pol Asturianu”, analiza’l periodista, qu’añade que “hai que reconocer l’aumentu de partíes como ye’l casu de la tresferencia a l’Academia de la Llingua Asturiana que medra nunos 12.500 euros, pero consideramos que ye un error volver a destinar una partida pa la creación de conteníos n’asturianu en RTPA cuando esi importe debería salir de los propios presupuestos del ente. Al igual que los informativos de Deportes de la TPA nun salen de los presupuestos de la Dirección Xeneral de Deportes, creemos que la financiación de los programes n’asturianu de la RTPA nun deberíen de salir del Presupuestu de la Dirección Xeneral de Política Llingüística”.

Iniciativa pol Asturianu recuerda tamién la necesidá d’una política llingüística tresversal que nun se da nesti proyeutu de presupuestos. “Nun puede depender únicamente de la Conseyería de Cultura y Turismu, sinón de tola acción de gobiernu. La normalización del asturianu depende de Política Llingüística y de Cultura, pero tamién afecta a Sanidá, Infraestructures, Educación, Facienda o Industria como recoyemos nel informe que presentamos va unes selmanes a los grupos parllamentarios”, apunta Llera.

El presidente del coleutivu fina’l so análisis de les cuentes “reconociendo esi incrementu d’un 11,80 por cientu del presupuestu de la Dirección Xeneral de Política Llingüística y la bona voluntá del Gobiernu”, pero asegurando al empar “qu’estos presupuestos son poco ambiciosos na cuestión llingüística”.

Na semeya, el presidente de la Xunta Xeneral, Marcelino Marcos, recibe de la conseyera de Facienda, Ana Cárcaba, el llápiz de memorial col Proyeutu de Llei de Presupuestos Xenerales pal 2020 pa entamar cola tramitación parllamentaria.