La Universidá d’Uviéu contará con un Serviciu de Normalización Llingüística l’añu qu’entra

Antón García, direutor xeneral de Política Llingüística, confirmó que ta prevista una partida nes cuentes del 2020 pa l’apertura d’un Serviciu de Normalización Llingüística na Universidá d’Uviéu. Definió estos órganos como “pieces clave pa la normalización de la llingua” tres un conceyu colos responsables de los activos anguaño.

La sede de la direición xeneral foi’l llugar de la xunta celebrada ayeri. Nella tuvieron presente los téunicos al frente de los SNL de Xixón, Avilés, ‘Comarca de la Sidra’, Cangas del Narcea, Llangréu, Ḷḷena, Parque Histórico del Navia, Corvera, Llaviana, Ozcos-Eo y Llanera, esto ye, tolos que funciones nestos momentos, a la espera de que s’incorpore’l de Grau-Candamu tres el concursu-oposición convocáu.

Nesta primer toma de contautu García anunció que ta prevista una ayuda pa l'apertura, nel 2020, d'un serviciu de normalización nuevu, nesti casu de la Universidá d'Uviéu. El direutor xeneral destacó la importancia que tienen estos servicios “como pieces clave pa la normalización de la llingua” y comprometióse a reforzar la coordinación de cara a optimizar los recursos, sobre manera na ellaboración y espardimientu de campañes, cursos d'adultos, usu de la toponimia oficial y, en xeneral, nes distintes prestaciones qu'ufierten a la ciudadanía.

Na semeya, García nel centru colos téunicos y trabayadores de la direición xeneral.