El primer presupuestu de Barbón algama los 4.757 millones, una medra del 5,1 por cientu con respeuto a les cuentes actuales

El Gobiernu presentó esti xueves el so Proyeutu de Llei de Presupuestos Xenerales pal 2020. Les cuentes ascienden a los 4.757 millones d’euros, un 5,1 por cientu más qu’esti añu, y incorporen incentivos fiscales pal mediu rural y una apuesta pola ciencia y la innovación, según destaquen dende l’Executivu d’Adrián Barbón.

A la espera de sumar sofitos pa sacar alantre’l presupuestu, con negociaciones avanzaes con Asturies pela Izquierda y Podemos, Ana Cárcaba, conseyera de Facienda, entregó les cuentes a Marcelino Marcos, presidente de la Xunta Xeneral, tres la so aprobación en Conseyu de Gobiernu, pa comenzar cola so tramitación nel Parllamentu. El procedimientu siguirá cola apertura del plazu de presentación d’enmiendes, tanto parciales como de totalidá, que va finalizar a les 9 hores del día 23, pa celebrar el Plenu del alderique de totalidá’l 26 y, si finalmente el proyeutu de llei supera esi trámite, aprobalu na sesión plenaria del 30.

El gastu non financieru presentáu pol Gobiernu de Barbón ye de 4.159 millones d'euros, llegando la inversión social a los 3.195 millones (el 67,1 por cientu del total y una medría de 114 millones, llevando Salú la mayor partida: 1.827,5 millones) y la productiva a lo 366 millones. Incorpora amás dos novedaes fiscales: deducciones sobre la cuota íntegra autonómica del IRPF que tienen por oxetu combatir la despoblación del mediu rural favoreciendo la natalidá, el fomentu de l'actividá económica y la movilidá, y l’incrementu del tipu aplicable a les apuestes sobre acontecimientos deportivos, de competición o hípiques, que va pasar del 10 al 15 por cientu.

La nueva Conseyería de Ciencia, Innovación y Universidá lleva un presupuestu de 185 millones d'euros, de los que 142 millones formen parte del financiamientu de la Universidá d’Uviéu. Nel planu de la Ciencia, van destinase 4,3 millones a partir ente los programes Margarita Salas pa l'atraición y retención de talentu d'investigadores de gran reconocencia internacional; el Programa Xovellanos pa la contratación d'investigadores, teunólogos, personal téunicu y otros profesionales; los Doctoraos Industriales pal fomentu de la tresferencia de conocencia ente l'ámbitu académicu y el profesional; y los denominaos Open Labs, pa favorecer el desenvolvimientu y tresferencia de la conocencia ente'l sector públicu y priváu

Cultura apuesta pol Xacobéu y la promoción turística

La Conseyería de Cultura de Cultura, esti añu separtada d’Educación y con Turismu incorporáu –amás d’añadir el nome de Política Llingüística–, va contar con una dotación global de 47 millones. L'apueste pol Camín de Santiago y el desenvolvimientu d'aiciones dirixíes a la celebración del Xacobéu 2020 o la promoción turística d'Asturies van ser dos de les sos principales llinies de cara al añu que vien, según destaquen dende’l Gobiernu.

N'Educación, el presupuestu xube un 5,3 por cientu hasta los 867 millones, lo que va dexar que se dediquen cuasi 13 millones a inversiones en centros educativos como los nuevos IES de La Corredoria, La Fresnera o La Florida, y Rei Pelayo de Cangues d'Onís. Tocantes a la etapa de 0 a 3 años, esti presupuestu xube la partida a 17,1 millones, incorporando una bonificación del 100 por cientu de la matrícula pal tercer y siguiente fíu que se matriculen, midida que va aplicase nel cursu 2020/2021.

Nel capítulu de Servicios Sociales, l’asignación llega a los 500 millones, un 10,5 por cientu más, a pesar de que la dotación pal salariu social baxa en 7 millones de resultes del enclín a la baxa na solicitú de prestaciones y la meyora na xestión. Destaca la medría en 3,5 millones pa l'aplicación de la Llei d'Acción Concertada o l'aumentu del presupuestu del ERA en 6,5 millones pa llegar a los 141,8 millones.

El capítulu de tresportes, carreteres y puertos va tener una dotación de 118 millones. Va siguise coles obres del accesu a la plataforma loxística ZALIA, asina como coles actuaciones nes exes interiores entre L’Infiestu y El Campu y ente Ḷḷuarca y La Puela, amás d’acutar 400.000 euros pa l'asistencia téunica de cara a la ellaboración d'un Plan Estratéxicu de Calidá del Aire con horizonte nel 2025.

Pa Desarrollu Rural ta programada una partida global de 221,4 millones, onde van tener incidencia especial les ayudes pa la incorporación de la xente mozo al campu, que van cuntar con cuasi 13 millones, y la llucha contra les especies invasores. No que se refier al sofitu a les entidaes locales, destaca'l Fondu de Cooperación Municipal, que s'incrementa hasta los cuasi 8 millones, mentes que se caltién el Programa d'Obres y Servicios, tan importante pa los conceyos pequeños, con una asignación de 3,1 millones.