Carlos Alba ‘Cellero’ lleva’l I Premiu Nel Amaro de teatru cola so adaptación del ‘Lazarillo de Tormes’

|
Carlos Alba ‘Cellero’ lleva’l I Premiu Nel Amaro de teatru cola so adaptación del ‘Lazarillo de Tormes’

‘Llázaro de Tormes’, de Carlos Alba ‘Cellero’, pasa a la historia por ser la primer obra en llevar el Premiu y Festival Nel Amaro de Teatru Profesional en Llingua Asturiana o Gallego-asturiano. Trátase d’una adaptación del clásicu anónimu de la lliteratura castellana.

Tres poder contemplar en direuto a les cuatro obres finalistes en cuatro sesiones abiertes al públicu nel uviedín Teatru Filarmónica a lo llargo de payares, el xuráu aconceyáu ayeri decidió dar el gallardón por mayoría a ‘Llázaro de Tormes’ al reconocer nél una “adaptación rellumante d’un clásicu a la cultura asturiana, con un gran procuru llingüísticu tanto nel testu como na representación del espectáculu, entroncando con un xéneru tradicional asturianu como ye’l monólogu, dignificándolu”.

Quedaben a les puertes del primer Nel Amaro, mentes, ‘Nunca nun se sabe’, ‘Planeta Joselín’ ‘Los amorinos de Bastián y Bastiana’. El xuráu encargáu de fallar el gallardón, que consiste nuna pieza artística y la promoción de la obra por parte del Gobiernu, tuvo formáu por Fernando Padilla, direutor xeneral de Planificación Llingüística y Normalización, como presidente; Eva Vallines, actriz y crítica teatral; Esther Castro Manzano, responsable del Serviciu de Normalización Llingüística de Siero; Cristina Muñiz Martín, escritora; José Ramón Iglesias Cueva, secretariu de l’Academia de la Llingua Asturiana; y Roberto Corte Martínez, direutor y críticu teatral.

Estrenada nel 2012

La obra ‘Llázaro de Tormes’ estrenóse nel xixonés Teatru Xovellanos el 18 d’ochobre del 2012 y ye una adaptación de la novela anónima ‘La vida de Lazarillo de Tormes y de sus fortunas y adversidades’. La comicidá y la complicidá col públicu tán presentes nel montaxe, que cuenta cola direición escénica de Felipe Santiago, ensin desdexar la calidá lliteraria del testu, con revisión llingüística a cargu del escritor Milio Rodríguez Cueto.

La entrega del Nel Amaro va tener llugar el 14 d’avientu nel Paraninfu de la Universidá d’Uviéu nuna ceremonia onde tamién van recibir los sos gallardones los ganadores de los Premios Lliterarios que tamién entama la Conseyería d’Educación y Cultura.

Contador Estadistiques