‘Allumamientu’, de Texón, lleva’l XXIV Premiu Xuan María Acebal de poesía

Pablo Texón ye’l ganador del XXIV Premiu Xuan María Acebal de poesía con 'Allumamientu'. L’autor de Felechosa, ún de los referentes del Tercer Surdimientu n’Asturies, consigue per primer vegada esti gallardón depués de llevar otros premios importantes.

Fernando Padilla, direutor xeneral de Planificación Llingüística y Normalización, presidió un xuráu que tuvo conformáu polos escritores Aida Fernández Escudero, Marisa López Diz, Lourdes Álvarez García, Xosé Miguel Suárez Fernández ‘Tapia’ y Pablo X. Suárez Fernández, ganador de la edición pasada con ‘Little Babilonia’. El poemariu ‘Allumamientu’, presentáu baxo’l nomatu de Bartleby, foi l'escoyíu ente tolos presentaos pola “la orixinalidá temática, asina como la destreza rítmica y la variedá estilística de los poemes, que-y permiten construyir una voz poética singular pa reflexonar sobre la paternidá dende una concepción esperiencial”. 

Abierta la plica, l’autor resultó ser Texón, que lleva una recompensa de 3.000 euros. Nacíu nel 1977, el de Felechosa ye maestru de Secundaria y cuenta con una gran trayeutoria lliteraria, con un Nené Losada Rico (2005) y un Teodoro Cuesta (2006) –ex aequo con Pablo Rodríguez Medina– nel so palmarés, que se corona agora col mayor premiu de la poesía n’asturianu.

L’escritor tamién ye collaborador habitual en diarios asturianos y revistes lliteraries, y tien escrito lletres pa grupos musicales y cantantes como Dixebra, Verdasca, Alfredo González o Toli Morillla. La versión asturiana de ‘Xulia’ (2007), d’August Strindberg, pa Teatro Margen, lleva d’igual forma la so firma.

Los otros gallardones

De los Premios Lliterarios 2018 qu’entrega la Conseyería d’Educación y Cultura queden entovía por conocer el XXXIX Xosefa Xovellanos de novela y el XXIV Máximo Fuertes Acevedo d’ensayu. El X Premiu Alfonso Iglesias de cómic foi pa ‘Cacique blancu’, d’Anxelu González Fernández, mentes que’l XI Premiu María Xosefa Canellada de lliteratura infantil y xuvenil llevólu la obra ‘Invisible’, de Lluis Aique Iglesias Fernández.

Na semeya, últimes obres ganadores del Premiu Xuan María Acebal de poesía.