‘Cacique blancu’, d’Anxelu González, X Premiu Alfonso Iglesias de cómic

Los Premios Lliterarios 2018 yá conocen al primer ganador, en concreto'l de la estaya de cómic. Trátase d’Anxelu González Fernández, que lleva’l X Premiu Alfonso Iglesias por ‘Cacique blancu’, obra que narra la historia real d’un asturianu emigráu a América.

El xuráu encargáu de valorar les obres presentaes axuntó na mañana d’ayeri baxo la presidencia del direutor xeneral de Planificación Llingüística y Normalización, Fernando Padilla, y tuvo formáu pol artista gráficu Alberto Vázquez García, ganador de la edición pasada con ‘Los llazos coloraos’; y los autores Carolina González Rodríguez y Ernesto García del Castillo ‘Neto’, mui conocíu pol so llabor d’humorista gráficu. Na reunión decidió conceder por unanimidá l’Alfonso Iglesias a Anxelu González, que se presentó baxo’l nomatu de ‘Astro’, señalando que ‘Cacique blancu’ se trata de “una propuesta innovadora no gráfico y narrativo, na que destaca l'usu espresivu del color pa conformar una historia interesante y desconocida”.

En concreto esta historia ye la de José Fernández Cancio (1870-1959), un asturianu de Taramundi qu’emigró a América, y les sos esperiencies na busca de los restos del esplorador vascu Pedro Enrique Ibarreta (1859-1898) y del italianu Guido Boggiani (1861-1901), dambos asesinaos por parte d’indíxenes en territorios paraguayos. L’ilustrador, que lleva una recompensa de 3.000 euros, completa los pocos datos qu’atopó de la vida de Fernández Cancio cola de los dos aventureros.

Na semeya, dalgunes de les obres ganadores del Premiu Alfonso Iglesias de cómic.