“Tamos equí por amor, y l’amor siempre gana”

Los mensaxes destinaos a los intolerantes, a aquellos sectores qu’ataquen y traten de facer de menos a la llingua asturiana, protagonizaron los discursos de los Premios Lliterarios 2018 y del II Nel Amaro de teatru profesional. “Tamos equí por amor, y l’amor siempre gana”, aseguró'l poeta Pablo Texón na so intervención.

L’escritor de Felechosa consiguió’l XXIV Premiu Xuan María Acebal de poesía por ‘Allumamientu’. Yera ún de los premiaos ayeri, xunto con Manuel García Menéndez (XXXIX Premiu Xosefa Xovellanos de novela por ‘El visitante impropiu’), Damián Barreiro (XXIV Premiu Máximo Fuertes Acevedo por ‘Asturploitation’), Lluis Aique Iglesias (XI Premiu María Xosefa Canellada de lliteratura infantil y xuvenil por ‘Invisible’), Anxelu González (X Premiu Alfonso Iglesias de cómic por ‘Cacique blancu’) y Laura Iglesia (direutora de ‘Hansel y Gretel’, obra d’Higiénico Papel Teatro merecedora del II Premiu y Festival de Teatru Profesional en Llingua Asturiana y Gallego-asturiano).

Hasta’l conseyeru d’Educación y Cultura, Genaro Alonso, sumóse a les crítiques contra estes campañes contra l’idioma. “Tamos nunos tiempos nos que dalgunos siguen presos de prexuicios y quiciabes tamién d’inorancies, aneciendo na idea de que la nuestra llingua nun tien valir pa utilizase en tolos contestos. Pero equí tamos nós, sacando a la lluz lo meyor de la nuestra llingua, de la nuestra cultura”.

Enantes, facía un alegatu en defensa del bon emplegu de la llingua asturiana. “L’amestáu ye’l mayor enemigu internu de la llingua asturiana”, aseguró Alonso, que añadió que “nun ye conveniente falar, y menos escribir, como quién”, polo qu’afaló a los ciudadanos a evitar “usos incorreutos o interferencies qu’adulces van acabando cola so identidá, coles sos propiedaes más intrínseques”.

“L’asturianu fálase y tamién s’escribe”

Énte un Paraninfu práuticamente enllenu, los ganadores foron recoyendo la pieza artística que forma parte de premiu y, ente agradecimientos de toda mena, dexaron dellos mensaxes nuna mesma direición. Texón destacó l’atrevimientu del xuráu por apostar por “un poemariu íntimu y peculiar, díficil d’empatizar con él”, y cargó contra “los que nos quieren negar, facenos invisibles. Tamos equí por amor, y l’amor siempre gana. Nun van ser a ello”.

García Menéndez agradeció la paciencia de la so familia por aguantar tol procesu d’ellaboración de la novela y apuntó que “tamos como 40 años atrás afirmando que l’asturianu esiste cuando deberíemos tar n’otra fase, la de que se siga falando más gracies a preseos como la oficialidá, la Educación o los medios de comunicación. L’asturianu fálase y tamién s’escribe”. Por último, llamó a “mercar llibros y lleelos”.

El discursu más encendíu protagonizólu Barreiro, que comenzó la so intervención señalando que “falten más muyeres” na semeya de los premios, pa denunciar darréu “el techu de cristal que entovía esiste na sociedá, tamién na cultura”. “Nun momentu nel que la estrema derecha aporta a les instituciones hai que recordar que’l feminismu, y el mesmu asturianismu, ye en realidá la llucha por un mundu meyor y más xustu”.

El ganador de la estaya d’ensayu tamién fixo referencia a “la campaña del odiu” esistente que enarbolia l’argumentu de “que los que defendemos esta llingua ye porque queremos vivir d’ello; qu’inventemos un bable de llaboratoriu pa poder folgar a gustu. Yo vivo de facer periodismu n’asturianu y toi convencíu de qu’eso ye muncho más digno que dalguna que lleva 30 años viviendo de la política ensin ser quien a ganar nengunes eleiciones. Tengo claro que ye muncho más digno que tar abellugáu baxo’l paragües del únicu partíu condenáu por corrupción en toda Europa”.

Por último, y en referencia al conteníu del so trabayu, solicitó a la Conseyería d’Educación y Cultura la recuperación de les ayudes a la producción audiovisual, la grabación de la obra ganadora del Nel Amaro pa la so emisión en televisión, y “restaurar y doblar al nuesu idioma la película ‘Las aventuras de Pinín y sus amigos’”.

Respetu mutuu

Iglesias, pela so parte, fixo referencia a la so obra ‘Invisible’, el rellatu d’un adolescente que quier ser invisible a la sociedá, pa demandar que “nun haya más invisibles, nin asturfalantes, nin el coleutivu LGTBQ, nin inmigrantes, nin muyeres maltrataes, nin xitanos, nin rumanos…”. Poro, solicitó “dignidá y respetu mutuu”.

“Nun hai nada meyor que la cultura y la educación contra la intolerancia”, destacó González, que reivindicó’l papel del cómic. Mentes, Iglesia emponderó’l llabor que fai’l teatru n’asturianu pola normalización y dedicó’l premiu a aquelles persones “que se dexen la piel pola llingua asturiana”.

La gala d’entrega, que tuvo presidida, amás de por Alonso, pol rector de la Universidá d’Uviéu, Santiago García Granda; el direutor xeneral de Planificación Llingüística y Normalización, Fernando Padilla; y la direutora xeneral d'Universidaes y Investigación, y María Cristina Valdés, finó con una actuación d’Héctor Braga acompañáu del so arpa. Enantes, el rector agradecía a los ganadores “pola vuesa contribución a la dignificación de la lliteratura asturiana y, por supuesto, de la llingua d’Asturies”.

Ente’l públicu asistente a la gala d’entrega de los gallardones destacó la presencia de Nicanor García Fernández, voceru de Ciudadanos na Xunta Xeneral; Wenceslao López Martínez, alcalde d’Uviéu; y Xosé Antón González Riaño, presidente de l’Academia de la Llingua Asturiana, ente otres personalidaes.

Na semeya, Iglesia, González, Iglesias, Texón, Barreiro y García Menéndez, ganadores de los premios d'esti añu.