‘Hansel y Gretel’, d’Higiénico Papel, gana’l II Premiu y Festival Nel Amaro

|
'Hansel y Gretel', d'Higiénico Papel

La visión personal del cuentu clásicu de los hermanos Grimm ‘Hansel y Gretel’ que fai la compañía Higiénico Papel Teatro ye la obra ganadora de la segunda edición del II Premiu y Festival de Teatru Profesional en Llingua Asturiana y Gallego-asturiano. Xuan Fernandi encargóse de la torna al asturianu del testu orixinal.

El xuráu encargáu de valorar les obres finalistes reunióse ayeri baxo la presidencia del director xeneral de Planificación Llingüística y Normalización, Fernando Padilla, depués de presenciar les cuatro obres finalistes que se representaron esti mes, en funciones abiertes al públicu, nel uvieín Teatru Filarmónica. Éstes foron, amás de la ganadora, 'Aire', de Producciones Nun Tris; 'Garráime que lu mato o La lloca hestoria d'Asturies', d'Escenapache; y 'Disculpe caballeru', de Zig Zag Danza.

Los miembros encargaos d’escoyer al ganador foron Eva Vallines, actriz y crítica teatral; Esther Castro, responsable del Serviciu de Normalización Llingüística de Siero; la escritora Cristina Muñiz Martín; Xosé Ramón Iglesias Cueva, secretariu de l’Academia de la Llingua Asturiana; y Roberto Corte Martínez, direutor y críticu teatral. Por mayoría fallaron a favor de ‘Hansel y Gretel’ al reconocer nél “una adaptación fecha con muncha sensibilidá, humor y inxeniu, onde se mecen los personaxes del cuentu colos de la obra y los intérpretes, nun cenciellu y rellumante xuegu metateatral, fechu con un gran procuru llingüísticu”, según destaca l’acta.

Dirixida por Laura Iglesia, avéranos una visión mui personal del clásicu de los hermanos Grimm onde amuesa lo poco que ye menester pa poder crear mundos onde la única llende ye’l nuestru maxín. Un espectáculu pa tola familia, interpretáu por Félix Corcuera, Carlos Dávila y la propia direutora, nel que la reciella afaya una forma distinta y cercana de vivir una historia y los más adultos viven alcordances d'una infancia de cuentos.

Higiénico Papel algama col Nel Amaro una recompensa de 6.000 euros y una pieza artística, amás d’un compromisu de promoción de la obra por parte del Gobiernu. L’actu d’entrega ta previstu pal 13 d’avientu nel Edificiu Históricu de la Universidá d’Uviéu.

Contador Estadistiques