Postreros díes pa presentase a los Premios Lliterarios del 2018

El 17 de setiembre ye’l día llende pa la presentación de los trabayos a concursu pa cuatro de les estayes que conformen esta iniciativa de la Conseyería d'Educación y Cultura, esto ye, el Xosefa Xovellanos de novela, na so trentena novena edición; el Xuan María Acebal de poesía y el Máximo Fuertes Acevedo d’ensayu, na ventenu cuarta; y el María Xosefa Canellada de lliteratura infantil y xuvenil, na undécima. L’Alfonso Iglesias de cómic, que celebra la so décima edición, zarra’l plazu’l 3 de setiembre.

Igual que nos años últimos, pal  gallardón na categoría de cómic nun ye necesario presentar la historia completa, sinón que val con un proyectu inicial con una estensión mínima de quince páxines.

Na edición del 2017, los premios fueron pa Berta Piñán, merecedora de X Premiu María Xosefa Canellada de lliteratura infantil y xuvenil por ‘Vida nel campu’, y del XXXVIII Premiu Xosefa Xovellanos de novela con ‘Como la muda al sol d’una llagartesa’; Alberto Vázquez García, que ganó’l IX Alfonso Iglesias de cómic por ‘Los llazos coloraos’; Xuan Santori, que llevó’l XXIII Premiu Máximo Fuertes Acevedo d’ensayu con ‘42.553: depués de Buchenwald’; y Pablo X. Suárez, que mereció’l XXIII Premiu Xuan María Acebal de poesía por ‘Little Babilonia’.

La recompensa pa los ganadores de los Premios Lliterarios va ser tamién la mesma: 3.000 euros. 

Semeya: Gala d'entrega Premios Lliterarios 2017