El vienres comiencen les representaciones del II Premiu Nel Amaro

|
Cartelu II Premiu y Festival Nel Amaro de Teatru Profesional en Llingua Asturiana y Gallego-asturiano

Esti gallardón reconoz a les meyores obres teatrales n'asturianu y gallego-asturiano.

El II Premiu y Festival Nel Amaro de Teatru Profesional en Llingua Asturiana y Gallego-asturiano yá conoz a los cuatro finalistes qu'aspiran a asoceder nel palmarés al 'Llázaro de Tormes' de Carlos Alba 'Cellero'. Les obres que pasaron el corte del xuráu son 'Aire', de Producciones Nun Tris; 'Hansel y Gretel', d'Higiénico Papel Teatro; 'Garráime que lu mato o La lloca hestoria d'Asturies', d'Escenapache; y 'Disculpe caballeru', de Zig Zag Danza.

Los cuatros primeros vienres de payares va representase nel uvieín Teatru Filarmónica, con entrada llibre, una d'estes representaciones teatrales a les 20 hores. La primera va ser 'Aire', espectáculu que "recrea un escenariu post-catástrofe, pero deriváu d’una situación d’esaniciu, d’escaezu. Nesi contestu performánticu, la llinia dramática marcada polos poemes y que-y apurre un desendolque al espectáculu ye clara: pártese de temes más o menos comunes na poesía o la lliteratura asturiana d’anguaño, como la derrota, la idea de país, de casa o patria; dende’l caos viáxase hacia la creación d’una nueva realidá sobre les murueques del desaniciu".

El turnu de 'Hansel y Gretel' va ser el 9; 'Garráime que lu mato o La lloca hestoria d'Asturies', el 16; y 'Disculpe caballeru', el 23. La obra que resulte ganadora va llevar una recompensa de 6.000 euros, gran novedá de la convocatoria d'esti añu.

 

Contador Estadistiques