El II Premiu y Festival Nel Amaro va tener una recompensa de 6.000 euros

|
'Llázaro de Tormes' de Carlos Alba 'Cellero'

La Conseyería d’Educación y Cultura ta acabante de convocar el II Premiu y Festival Nel Amaro de Teatru Profesional en Llingua Asturiana o Gallego-asturiano. Ésti va caltener el mesmu formatu, cola novedá de qu'incorpora una recompensa económica.

Ésta va ser de 6.000 euros y se suma al compromisu de promoción de la obra por parte del Gobiernu. Al gallardón pueden aspirar toles empreses del sector profesional dedicaes a la producción y representación d’espectáculos teatrales, ya sía persones físiques o xurídiques, que presenten a concursu una obra estrenada y representada en llingua asturiana o gallego-asturiano, quedando escluyíes aquelles que foren finalistes na primer edición.

‘Llázaro de Tormes’, de Carlos Alba ‘Cellero’, foi la ganadora del I Nel Amaro tres convencer al xuráu frente a ‘Nunca nun se sabe’, d’Higiénico Papel; ‘Planeta Joselín’, d’Escenapache; y ‘Los amorinos de Bastián y Bastiana’, de Producciones Nun Tris. Toes estes representaciones esceneficáronse nel uvieín Teatru Filarmónica tolos vienres de payares en sesiones abiertes al públicu, iniciativa que va repetise esti añu pa la segunda edición.

D’esta forma se pretende averar a la ciudadanía les meyores creaciones teatrales n’asturianu y gallego-asturiano, asina como potenciar l’arte dramáticu nel país. El plazu pa presentar solicitúes pa optar al gallardón ye de 20 díes naturales dende güei, tres espublizase ayeri la convocatoria del II Nel Amaro nel Boletín Oficial del Principáu d’Asturies (BOPA).

Na semeya, una escena de 'Llázaro de Tormes', obra de Cellero ganadora de la primer edición del Nel Amaro.

Contador Estadistiques