El I Premiu Nel Amaro de teatru n’asturianu aporta a la fase de representación de les obres finalistes

|
'Nunca nun se sabe', d'Higiénico Papel

Cada vienres de payares va representase nel uviedín Teatru Filarmónica una de les cuatro obres finalistes del I Premiu y Festival Nel Amaro de Teatru Profesional en Llingua Asturiana o Gallego-asturiano. 'Nunca nun se sabe', d'Higiénico Papel, abre'l festival.

Nacíu “pa consolidar, arriquecer y  prestixar la llingua y la cultura asturianes, na creencia, amás, de qu’actuaciones como ésta contribúin de forma eficaz a dinamizar l’actividá cultural de la comunidá  autónoma, y n’especial un aspectu tan importante de la mesma como ye’l  del arte dramáticu en toles sos variantes”, el Nel Amaro trátase d’una vieya demanda del sector y vien a sumase a los Premios Lliterarios que convoca tolos años la Conseyería d’Educación y Cultura en cinco estayes. Un xuráu formáu por espertos en teatru y nel idioma fixo una seleición ente les obres presentaes a concursu, saliendo asina los cuatro finalistes qu’aspiren al premiu.

Pa ello, los espertos tuvieron en cuenta la direición y dominiu escénicu; la calidá del testu, tanto na so aguada dramática como llingüística; la fluidez y correición nel usu del idioma; la interpretación; y la escenografía y vestuariu. Les creaciones merecedores de pasar a la segunda fase del premiu, un festival, que s’inicia esta tarde, foron ‘Nunca nun se sabe’, d’Higiénico Papel; ‘Llázaro de Tormes’, de Carlos Alba ‘Cellero’; ‘Planeta Joselín’, d’Escenapache; y ‘Los amorinos de Bastián y Bastiana’, de Producciones Nun Tris.

Entrada llibre pal públicu

‘Nunca nun se sabe’ va ser la encargada d’abrir esti ciclu de representaciones que van tener llugar tolos vienres de payares, a les 20 hores nel Filarmónica, con entrada llibre pal públicu. Darréu va ser el turnu de ‘Llázaro de Tormes’ (día 10), ‘Planeta Joselín’ (17) y ‘Los amorinos de Bastián y Bastiana (24).

D’esta forma’l xuráu va poder tamién ver les obres en direuto y valorar cuála ye merecedora de llevar la primer edición del premiu, que consiste nuna pieza artística y la promoción y espardimientu del espectáculu nos medios de comunicación públicos y nos eventos entamaos pol propiu Gobiernu. La entrega del Nel Amaro va tener llugar el 14 d’avientu nel Paraninfu de la Universidá d’Uviéu nuna ceremonia onde tamién van recibir los sos gallardones los ganadores de los Premios Lliterarios.

Contador Estadistiques