El taller ‘Traxinando n’Avilés’ y una sesión nueva de La Reciella de La Factoría van tener llugar esti vienres n’Avilés. Nesta ocasión Kamante Teatro va representar ‘Montesín’, obra de marionetes basada nel clásicu infantil de María Xosefa Canellada.
La Escolina de Reciella yá echó a andar n’Uviéu con ochos alumnos y alumnes qu’acuden toles tardes de los llunes al Colexu Públicu La Gesta p’averase a la llingua asturiana. D’esta forma aumenten a seis los grupos activos, al sumase al de Candás y a los cuatro de Xixón.
Esti martes, nel Muséu del Pueblu d'Asturies, van celebrase los XIV Alcuentros de la Mocedá cola Llingua qu'entama la Oficina de Normalización Llingüística de Xixón dirixida al alumnáu que recibe clase d'asturianu nos Institutos d'Educación Secundaria de Xixón. Mediu millar de mozos y moces van participar en talleres, cantar o xugar n'actividaes cola llingua asturiana como idioma vehicular.
La primer temporada de ‘Fálame’ va consistir en 26 visites a centros educativos del país pa que los escolinos y escolines s’espresen en llingua asturiana o gallego-asturiano. Pese a que’l conseyu d’alministración de RTPA tenía avisu del estrenu d’esti programa infantil pal domingu, la so primer emisión va retrasase finalmente.
El programa infantil en llingua asturiana de TPA, ‘Fálame’, tien previstu’l so estrenu’l día 23. Esti espaciu pa la reciella que va emitise nes mañanes del domingu, con redifusión el sábadu siguiente.
Pablo Suárez García (Udrión, 1973) nun apara nel so llabor d’investigación y de traducción. Nel mes de mayu va espublizar la so torna del clásicu castellanu del Llazarín de Tormes (Laria), ta acabante d’asoleyar dellos trabayos llingüísticos sobre Trubia y tien en marcha o finaos a la espera d'entrar n'imprenta dellos proyeutos más.
Los escolinos y escolines del Colexu Públicu Sabugo van recibir esti vienres a un visitante mui especial. Trátase de Samalandrán, el míticu monxu marín irlandés, que torna a Avilés pa trayer el bollu y contar la lleenda de la islla de Samalandrán.
Un cuentacuentos, una esposición y la presentación d’un llibru conformen la programación n’asturianu de la IV Feria del Llibru Infantil y Xuvenil que se celebra en Xixón del vienres al domingu. El Centru Municipal Integráu Pumarín-Xixón Sur va acoyer toles actividaes.
El vienres va celebrase’l primer de los trés talleres ‘Traxinando n’Avilés’ sobre indumentaria tradicional a cargu de Susana Sela previstos nos meses próximos. La Estaya de la Llingua entama esta iniciativa de baldre pa neños y neñes de 5 a 10 años.
La Conseyería d’Educación y Cultura ta acabante d’abrir el plazu pa presentar solicitúes pa celebrar actividaes de l’Axenda Didáctica Escolar 2016-2017 nos centros educativos. En total hai pa escoyer ente 117 propuestes, 70 en Primaria y 47 en Secundaria.
