Los centros yá pueden solicitar actividaes de l’Axenda Didáctica

Axenda Didáctica Escolar 2016-2017

La Conseyería d’Educación y Cultura ta acabante d’abrir el plazu pa presentar solicitúes pa celebrar actividaes de l’Axenda Didáctica Escolar 2016-2017 nos centros educativos. En total hai pa escoyer ente 117 propuestes, 70 en Primaria y 47 en Secundaria.

Les escueles con clase de Llingua Asturiana y Gallego-asturiano pueden solicitar cuatro de les actividaes, per orde de preferencia, entes les que propón l’Axenda Didáctica hasta’l 24 de marzu. Una comisión va analizar tolos pidimientos y, al traviés d’un baremu, facer el repartu de les mesmes pelos centros.

Ente les posibilidaes ufiertaes hai espaciu pa la lliteratura, la música, talleres de delles temátiques, cuentacuentos, teatru y ópera. Toles actividaes, que se pueden consultar nel documentu anexu a esta noticia, desendólquense n’asturianu y gallego-asturiano.