Bilordios Filolóxicos, por Ramón d'Andrés
Unos esquemes d'allugamientu de pronomes (27/05/02)
La selmana pasada viemos qué consecuencies trai, nel allugamientu de los pronomes átonos col verbu, l'énfasis d'un elementu del enunciáu, gracies a la tematización y a la focalización. Agora ufrimos unos esquemes onde apaecen exemplos de los yá vistos y otros.
Unes observaciones pa interpretar los esquemes: a) La parte tematizada d'un enunciáu representámosla en tolos casos con una pausa (una coma), anque non siempre ye obligada; b) Nes oraciones con un elementu focalizáu, escribímoslu con lletra versal y con signos d'esclamación; esto facémoslo pa mayor claridá, anque estos enunciaos nun son forzosamente esclamativos: c) Nos enunciaos neutros, ponemos un exemplu sin pronome átonu, y otru con elli; d) Los pronomes átonos sorrayámoslos y los pronomes qu'apaecen por tematización, ponémoslos en lletra negro.
A la vista del esquema, podéis comprobar los estremaos matices de significáu qu'algama a tener un mesmu enunciáu cuando se-y introduz un procedimientu d'énfasis.
1 - Énfasis d'un suxetu.
| Enunciáu neutru | Tematización | Focalización |
| Xuan faló con tolos clientes | Xuan, faló con tolos clientes | ¡XUAN faló con tolos clientes! |
| Xuan faló-yos bien del productu | Xuan, faló-yos bien del productu | ¡XUAN-yos faló bien del productu! |
2 - Énfasis d'un complementu directu
| Enunciáu neutru | Tematización | Focalización |
| Xuan faló con tolos clientes | Les maletes, el rapaz tráxoles con abondu esfuerzu | ¡LES MALETES traxo'l rapaz con abondu esfuerzu! |
| El rapaz tráxovos les maletes | Les maletes, tráxovosles el rapaz | ¡LES MALETES vos traxo'l rapaz" |
3 - Énfasis d'un complementu indirectu:
| Enunciáu neutru | Tematización | Focalización |
| El rapaz traxo les maletes a les vecines | A les vecines, el rapaz tráxo-yos les maletes | ¡A LES VECINES traxo'l rapaz les maletes! |
| La señora quexóse a los vendedores | A los vendedores, la señora quexóse-yos | ¡A LOS VENDEDORES se quexó la señora! |
4 - Énfasis d'un atributu:
| Enunciáu neutru | Tematización | Focalización |
| Llucía paez bona moza | Bona moza, Llucía paezlo | ¡BONA MOZA paez Llucía! |
| Llucía paeznos bona moza | Bona moza, Llucía paéznoslo | ¡BONA MOZA nos paez Llucía! |
5 - Énfasis d'un complementu circunstancial:
| Enunciáu neutru | Tematización | Focalización |
| Marcho mañana pela tarde | Mañana pela tarde, marcho | ¡MAÑANA PELA TARDE marcho! |
| Véovos mañana pela tarde | Mañana pela tarde, véovos | ¡MAÑANA PELA TARDE vos veo! |
