Espaciu y Tiempu de la Llingua Asturiana

Bilordios Filolóxicos, por Ramón d'Andrés

Fechos que pasen al mesmu tiempu (11/03/02)

Si queremos espresar que dos fechos asoceden al mesmu tiempu (o sía, simultaneidá), podemos emplegar una riestra d'espresiones, que básicamente axústense a estos esquemes: a) Dos verbos coordínense cola conxunción "y"; b) Un verbu subordínase a otru gracies a una conxunción; c) Un verbu toma valores d'alverbiu al apaecer n'infinitivu o en xerundiu. Vamos exemplificar con una situación: daquién, al falar, solmena les manes.

AL MESMU TIEMPU

Coordinación: Fala y solmena les manes al mesmu tiempu = Fala y, al mesmu tiempu, solmena les manes. Subordinación: Al mesmu tiempu que fala, solmena les manes = Solmena les manes al mesmu tiempu que fala. Infinitivu alverbial: Al mesmu tiempu falar, solmena les manes = Solmena les manes al mesmu tiempu de falar.

AL EMPAR

Coordinación: Fala y solmena les manes al empar = Fala y, al empar, solmena les manes. Subordinada: Al empar que fala, solmena les manes = Solmena les manes al empar que fala. Infinitivu: Al empar de falar, solmena les manes = Solmena les manes al empar de falar.

A LA VEZ

Coordinación: Fala y solmena les manes a la vez = Fala y, a la vez, solmena les manes. Subordinada: A la vez que fala, solmena les manes = Solmena les manes a la vez que fala. Infinitivu alverbial: A la vez de falar, solmena les manes = Solmena les manes a la vez de falar.

DE LA QUE

Subordinada: De la que fala, solmena les manes = Solmena les manes de la que fala.

A LA QUE

Subordinada: A la que fala, solmena les manes = Solmena les manes a la que fala

MIENTRES

Coordinación: Fala y solmena les manes mientres = Fala y, mientres, solmena les manes. Subordinada con QUE: Mientres que fala solmena les manes = Solmena les manes mientres que fala. Subordinada sin QUE: Mientes fala solmena les manes = Solmena les manes mientres fala. En tolos casos pue usase la forma "mentes".

MENTANTO

Coordinación: Fala y solmena les manes mentanto = Fala y, mentanto, solmena les manes. Subordinación con QUE: Mentanto que fala solmena les manes = Solmena les manes mentanto que fala. Subordinación sin QUE: Mentanto fala solmena les manes = Solmena les manes mentanto fala.

ENTRÍN

Coordinación: Fala y solmena les manes entrín = Fala y, entrín, solmena les manes. Subordinación con QUE: Entrín que fala solmena les manes = Solmena les manes entrín que fala. Subordinación sin QUE: Entrín fala solmena les manes = Solmena les manes entrín fala.

ENTRÍN Y NON

Coordinación: Fala y solmena les manes entrín y non = Fala y, entrín y non, solmena les manes. Subordinación con QUE: Entrín que fala y non, solmena les manes = Solmena les manes entrín que fala y non. Subordinación sin QUE: Entrín fala y non, solmena les manes = Solmena les manes entrín fala y non.

CUANDO

Subordinación: Cuando fala solmena les manes = Solmena les manes cuando fala

Y

Coordinación: Fala y solmena les manes.

AL

Infinitivu: Al falar solmena les manes = Solmena les manes al falar.

XERUNDIU

Falando, solmena les manes.

Cola ayuda de

Coneyería d'Educación y Cultura

Espaciu y Tiempu de la Llingua Asturiana
--Araz.net, © 2010. Tolos derechos reservaos.
Contador Estadistiques