Noticies a La Gueta

Los escolinos y escolines foron protagonistes na XXXVIII Selmana de les Lletres Asturianes

El martes finó la XXXVIII Selmana de les Lletres Asturianes, na que los escolinos y escolines del país foron protagonistes. Dos gales d’entrega de premios, visites guiaes, llectura de poemes y teatru n’asturianu foron les actividaes entamaes nestos díes d’homenaxe a la nuesa lliteratura.

La estrena definitiva de ‘Fálame’ va ser el día 21

La RTPA anunció que la estrena del programa infantil en llingua asturiana ‘Fálame’ va ser el domingu 21, en principio a les 9.15 hores. El deséu de la productora, Médula Producciones, ye que s’emita nun horariu más familiar.

Les XIV Xuntes d'Escolines y Escolinos d'Avilés van contar cola participación de 530 alumnos

L’Auditoriu del Centru Niemeyer va acoyer esti miércoles les XIV Xuntes d'Escolines y Escolinos d'Avilés cola participación de mediu millar d’alumnos y alumnes. Mentes, los Centros Socioculturales de la villa entamen cuentacuentos n’asturianu esta selmana.

Teatru en Xixón

El martes 2 de mayu a les 18:30h. nel salón d'actos del Antiguu Institutu va representase la obra 'Runa: un mundiu redondu' .

La reciella tien el vienres n’Avilés dos actividaes en llingua asturiana

El taller ‘Traxinando n’Avilés’ y una sesión nueva de La Reciella de La Factoría van tener llugar esti vienres n’Avilés. Nesta ocasión Kamante Teatro va representar ‘Montesín’, obra de marionetes basada nel clásicu infantil de María Xosefa Canellada.

El grupu d’Uviéu de La Escolina de Reciella echa a andar

La Escolina de Reciella yá echó a andar n’Uviéu con ochos alumnos y alumnes qu’acuden toles tardes de los llunes al Colexu Públicu La Gesta p’averase a la llingua asturiana. D’esta forma aumenten a seis los grupos activos, al sumase al de Candás y a los cuatro de Xixón.