"Xovellanos, un paisanu melgueru" va presentase en Xixón

Esti vienres 24 de febreru va presentase en Xixón "Xovellanos, un paisanu melgueru", llibru del que ye autora Carla Menéndez Fernández conxuntamente coles ilustraciones d'Irene Fenollar Robles.

Nel actu tarán presentes, amás de l'autora, el director de la Fundación Municipal de Cultura del Ayuntamientu de Xixón, Xosé Nel Riesgo, y la responsable de la editorial Pintar-Pintar qu'espubliza l'álbum ilustráu, Ángela Sánchez.
La presentación va tener llugar na Sala de Conferencies del Centru de Cultura Antiguu Institutu de Xixón a partir de les 19.00 hores.
Nel llibru "Xovellanos, un paisanu melgueru" l'autora va faciendo repasu pela vida de Xovellanos pente medies tanto los fechos históricos, como de los detalles menos conocíos, como la rellación colos miembros de la so familia y la so vida de neñu.
 
Na semeya l'autora, Carla Menéndez, na presentación del so llibru "Mansín"